VOV4.Êđê -  Ti Hà Nội, Phŭn bruă kahan ksiêm mkŏ mjing leh Klei bi kƀĭn trực tuyến hŏng dŭm Anôk bruă kahan ksiêm alŭ wăl čiăng tĭng dlăng boh tŭ bruă hluê ngă hdră mtrŭn mkŏ mjing êpul kahan ksiêm să, kahan ksiêm wăl krah hlăm kluôm ala čar; pŏk ngă Hdră mtrŭn mrô 22 hruê 15/3/2018 mŏng Phŭn bruă kđi čar kơ bruă lŏ dŏng mlih mrâo, mkŏ dăp anôk bruă mŏng Phŭn bruă kahan kaiêm hŏng hdră khuăt, ngă bruă tŭ dưn, truh kơ ară anei, kahan ksiêm 63/63 alŭ wăl lŏ dơ̆ng ba nao êbeh 43 êbâo knuă druh kahan ksiêm nao păn ngă kahan ksiêm să ti êbeh 7.800 să, wal krah. Hgao jih klei dleh dlan tal êlâo, êpul kahan ksiêm să, wăl krah hlăm kluôm ala pral nao ngă bruă ti alŭ wăl nah gŭ, dôk giăm hŏng mnuih ƀuôn sang, mđĭ hdră hiu suang dlăng, ksiêm dlăng bruă răng mgang klei êđăp ênang, pŏk ngă dŭm hdră thơ̆ng kơ bruă, mơ̆ng anăn mjing sa ai êwa mrâo hlăm bruă rơ̆ng kjăp klei êđăp ênang ti gưl nah gŭ, đru mkŏ mjing klei bi hmô êpul kahan ksiêm să jih ai tiê kyua mnuih ƀuôn sang, mă bruă kyua mnuih ƀuôn sang, jih jang kyua klei h’ĭt ênang, yâo m’ak kơ mnuih ƀuôn sang./.

H Nêč pô mblang