VOV4.Êđê - Aguah hruê 4/6, ti Hà Nội, K’iăng khua knŭk kna Lê Văn Thành – Khua anôk bruă gĭt gai gưl dlông kơ hdră gang mkhư̆, mdrơ̆ng hŏng klei yan adiê ngă sĭt gai leh Klei bi kƀĭn trực tuyến kluôm ala kơ hdră gang mkhư̆, mdrơ̆ng hŏng klei yan adiê ngă lehanăn tui duah mnuih mâo klei truh thŭn 2021 ti Anôk bruă knŭk kna. Klei bi kƀĭn mđing tĭng dlăng kluôm dhuôm kơ hdră gang mkhư̆, mdrơ̆ng hŏng klei yan adiê ngă thŭn 2020, hluê hŏng dŭm boh tŭ dưi mâo, dŭm bruă adôk kpăk đuôm, klei hriăm mâo sĭt hlăm hdră gĭt gai, kiă kriê klei bi kƀĭn kñăm ba mdah hdră êlan ngă bruă phŭn hlăm hdră gang mkhư̆, mdrơ̆ng hŏng klei yan adiê ngă thŭn 2021. Hluê ânn, pŏk ngă kjăp dŭm hdră msir kñăm gang mkhư̆ lehanăn msir mghaih klei truh kñăm bi hrŏ klei luič liê kơ mnuih lehanăn ngăn drăp, mkŏ mjing sa êpul êya êđăp ênang ti anăp klei truh mŏng yan adiê ngă. Thŭn 2020, klei yan adiê ngă ti ala čar drei mâo lu lehanăn dleh dưi ksiêm dlăng. Kluôm ala mâo leh 16 hlăm ênoh mâo 22 klei truh jhat mŏng yan adiê ngă. Klei tan adiê ngă ngă leh 357 čô mnuih djiê lehanăn luič amâo thâo ƀuh hŏng ênoh luič liê hlăm bruă duh mkra truh giăm 40 êbâo êklai prăk./.

H Nêč pô mblang