VOV4.Êđê- Aguah mbrue (27/5), phŭn bruă sang hră mơar mkŏ mjing leh klei bi kƀĭn trực tuyến hŏng 63 boh čar, ƀuôn prŏng kơ bruă mkŏ mjing klei bi lông jih gưl 3 thŭn 2021. Phŭn bruă sang hră mơar bi klă kơ klei gĭr mkŏ mjing klei bi lông anei, hŏng klei êđăp ênang, lehanăn djŏ klei bhiăn. Tui si phŭn bruă sang hră mơar, hŏng hđeh hriăm hră adŭ 12, ară anei mâo leh 18 čô hđeh mâo kman klei ruă tưp yap jing F0, 394 čô jing F1, lu ti 4 boh čar Bắc Giang, Bắc Ninh, Hà Nam lehanăn Điện Biên. Siămdah, mă klei hriăm mơ̆ng bruă mkŏ mjing gưl bi lông jih gưl 3 thŭn dih, snăn phŭn bruă sang hră mơar ăt mkŏ mjing klei bi lông. Ară anei phŭn bruă mkŏ mjing leh dŭm hdră kăp mdrơ̆ng hŏng djăp mta klei amâo mâo jăk mdê mdê. Phŭn bruă sang hră mơar mta kơ djăp alŭ wăl mkŏ mjing mơh hdră mă bruă kơ klei bi lông êjai hlăm wưng dôk găn klei ruă tưp covid 19./.

Pô mblang: Y-Khem Niê