VOV4.Êđê- Văn Lem, Đăk Tô jing să dleh dlan mơ̆ng čar Kon Tum, kluôm să mâo giăm 2.900 čô mnuih, mnuih djuê ƀiă truh 98% ênoh mnuih. Hluê ngă hdră bi mjut mjing hluê si ai tiê Hdră mtrŭn mrô 04 mơ̆ng bruă Đảng čar Kon Tum, 5 thŭn êgao, mbĭt hŏng bruă đru kơ să mjut mjing kriê dlăng, răng mgang lehanăn mđĭ kyar dliê, Keh răng mgang lehanăn mđĭ kyar dliê čar Kon Tum ăt bi hgŭm kjăp hŏng anôk bruă Đảng čar, bruă sang čư̆ êa alŭ wăl mbĭt hŏng dŭm êpul êya bruă mơ̆ng să mjing leh klei bi mlih hlăm hdră mđĭ kyar bruă duh mkra – ala ƀuôn, rơ̆ng kjăp klei êđăp ênang lehanăn mkra mđĭ klei hdĭp mnuih ƀuôn sang.

Ung mô̆ amao A Vinh, lehanăn Y Vân ti ƀuôn Đăk Xanh, să Văn Lem, kdriêk Đăk Tô mâo truh kơ 8 čô anak. Kyua anak lu, lehanăn klei hdĭp mda knŏng jưh knang mă hlăm lăm hma hbei ƀlang lehanăn mdiê lŏ snăn kplŭt aguah kƀah tlam nanao amâo mâo djăp êsei huă djam ƀơ̆ng. Thŭn 2018, jing sa hlăm 5 gŏ êsei mâo keh răng mgang lehanăn mđĭ kyar dliê čar Kontum ruah pioh mkŏ mjing hdră duh ƀơ̆ng “Bi đru, ktrâo atăt gŏ êsei rông ŭn mjeh ŭn dliê” pioh hdĭp mda. Mâo keh anei đru 2 drei ŭn ana mjeh, lehanăn sa drei ŭn knô bŏng pioh bi mdjuê, lehanăn prăk pioh ngă war, blei mnơ̆ng ƀơ̆ng kơ ŭn, truh kơ ară anei êpul ŭn sang ñu đĭ truh leh dŭm pluh drei. Mơ̆ng êpul ŭn anei đru leh ñu dưi mâo prăk yua hlăm gŏ sang, ñu yăl dliê kơ klei rông ŭn snei:

“Êlâo dih ka mâo ôh mnŭ kuăt snăn păng hŏng alê, đrao. Phŭn tal êlâo čiêm hŏng hbei ana mtei, êbua riă lehanăn bi lŭk hŏng amlơ̆k braih. Sui sa blư̆ mâo čhĭ djăp prăk blei djam mtam hră amrêč leh”.

Mơ̆ng dŭm bruă duh ƀơ̆ng, mâo Keh răng mgang lehanăn mđĭ kyar dliê čar Kontum mkŏ mjing ti să ngă klei mjĕ mjing Văn Lem, msĕ si: “Hriăm lehanăn tui ngă knhuah mngač Hồ Chí Minh”; “Bi đru ktrâo atăt diŭm gŏ êsei rông ŭn mdjuê hŏng ŭn dliê pioh mă êđai”; “Ktrâo atăt đru hdră pla mjing lehanăn dlăng kriê kphê...” Mâo đru leh phung ƀuôn sang hlăm să bi mlih hdră êlan mkă tĭng, kpưn đĭ kơ klei duh ƀơ̆ng. Truh kơ ară anei djăp hdră êlan duh ƀơ̆ng mâo keh mkŏ mjing đĭ lar leh hlăm djăp boh ƀuôn, mâo leh lu gŏ sang tui hriăm, hlue ngă. Amâo mâo djŏ ƀiă ôh gŏ êsei êlâo dih yap hlăm ênoh gŏ êsei dleh dlan knap mñai, ară anei mâo leh mơ̆ng yua, mnơ̆ng pioh dơ̆ng tlaih leh mơ̆ng klei dleh dlan. A Hùng, Khua să Văn Lêm lač:

“Wưng leh êgao Keh răng mgang lehanăn mđĭ kyar dliê mâo hgŭm kjăp hŏng bruă sang čư̆ êa alŭ wăl êjai klei kiă kriê bruă răng mgang mđĭ kyar dliê, lehanăn mâo klei mđing uêñ, bi đru hŏng phung ƀuôn sang hlăm să Văn Lem mđĭ kyar klei hdĭp mda. Keh răng mgang lehanăn mđĭ kyar dliê đru leh kơ phung ƀuôn sang msir klei ư̆ êpa bi hrŏ klei ƀun ƀin. Keh răng mgang lehanăn mđĭ kyar dliê Kontum đru leh kơ alŭ wăl kơ bruă lač anăn”.

Tui si Keh răng mgang lehanăn mđĭ kyar dliê čar Kontum ksiêm yap brei ƀuh hlăm 5 thŭn ngă klei mjĕ mjing, rŭ mdơ̆ng să dleh dlan Văn Lem, keh mâo ngă leh jăk bruă kơ klei hdĭp mda ala ƀuôn, hŏng ênoh jih jang dŭm êtuh êklăk prăk. Boh nik, dŭm bruă mâo êpul bruă Đảng, lehanăn êpul bruă êdam êra mơ̆ng Keh mtrŭt mjhar, msĕ si bruă hdơr knga tla ai, bruă đru kơ phung knap mñai, hđeh êlăk, hđeh hriăm hră mâo klei hdĭp dleh dlan, grăp thŭn đru kơ să mkŏ mjing Hrue mơak đŭng điŏ bi siam... Lač kơ jih jang bruă mjĕ mjing, rŭ mdơ̆ng să Văn Lem mơ̆ng keh răng mgang lehanăn mđĭ kyar dliê čar Kontum, Lê Trọng Thọ, khua bruă Đảng să brei thâo:

"Keh răng mgang lehanăn mđĭ kyar dliê mđing ngă mâo nanao klei bi mguôp hŏng bruă Đảng să Văn Lem mkŏ mjing, hlue ngă djăp bruă čuăn kơ klei mđĭ kyar klei hdĭp mda ala ƀuôn, răng mgang kjăp klei êđăp ênang yang ƀuôn, lehanăn mkŏ mjing bruă kđi čar hlăm să. Keh mâo klei mđing uêñ nanao mơ̆ng akŏ thŭn bi hgŭm hŏng să mkŏ mjing hdră djŏ guôp hŏng boh klei ti alŭ wăl. Nanao hlăm grăp mlan, amâodah 3 mlan sa blư̆ tiŏ nao phung knuă druh bi hgŭm ksiêm wĭt hlue ngă djăp bruă čuăn. Êjai hlăm klei dôk ngă bruă, snăn êpul êya bi đru ruh mgaih, lehanăn nao hưn hŏng dŭm êpul bruă mâo klei dưi".

Leh 5 thŭn ngă klei mjĕ mjing, mđrăm mbĭt bi đru klam hŏng bruă Đảng, bruă sang čư̆ êa, dŭm êpul êya lehanăn phung ƀuôn sang să Văn Lem, Keh răng mgang lehanăn mđĭ kyar dliê čar Kontum mâo leh dŭm klei đru mguôp yuôm bhăn hŏng klei mdĭ kyar hlăm să. Mơ̆ng sa boh să dôk hlăm klei dleh dlan, mnuih djuê ƀiă truh 98% ênoh mnuih, truh kơ ară anei Văn Lem mâo bi hrŏ leh hnơ̆ng ênoh gŏ êsei ƀun trŭn adôk 19,57%. Să djăp leh mơh 14/19 ênoh čuăn hlăm bruă mkŏ mkra krĭng ƀuôn sang mrâo./.

Pô mblang: Y-Khem Niê