VOV4.Êđê- Sa ai hŏng dŭm bruă hlăm hruê gŏ sang Việt Nam, aguah anei 28/6, êpup bruă phung mniê gưl dlông Việt Nam hrăm mbĭt leh hŏng anôk bruă ksiêm duah kơ gŏ sang lehanăn êkei mniê, anôk bruă ksiêm duah klei kreh knhâo yang ƀuôn Việt Nam mkŏ mjing klei kƀĭn trông klei kreh knhâo ala čar “Ba hdră mtrŭn mơ̆ng klei kƀĭn ala tal 13 hlăm klei hdĭp.” Hlăm klei kƀĭn trông anăn, dŭm čô bi ala dŭm phŭn, dhar, knơ̆ng bruă, dŭm čô thơ̆ng kơ bruă gŏ sang lehanăn êpul bi trông, bi trông kơ dŭm boh tŭ hlăm klei ksiêm duah kreh knhâo lehanăn klei hriăm kơ klei yuôm bhăn gŏ sang Việt Nam, klei ksiêm duah dưi ktrâo dŭm atur yuôm bhăn hlăm gŏ sang, djŏ hŏng klei hmăng hmưi, klei čiăng mơ̆ng phung mniê ăt msĕ hŏng bruă djŏ tuôm, bruă klam mơ̆ng êpul hgŭm phung mniê Việt Nam. Mbĭt hŏng anăn, mâo klei đru kčĕ, mtrŭt mjhar bruă ngă kơ gŏ sang hŏng dŭm hnơ̆ng čuăn djŏ lehanăn dưi mkŏ mjing hlăm hruê mmông ti anăp. Klei bi trông dưi mkŏ mjing hŏng hdră êlan klă anăp ti anôk bi kbĭn Hà Nội lehanăn êlan online hlăm ala čar hŏng êlan SureMeet.

Pô mblang: Y-Ƀel Êban