VOV4.Êđê- Tlam 15-6, hlăm jar Klei bi kƀĭn online Khua phŭn bruă lĭng kahan dŭm ala čar ASEAN tal 15 (ADMM-15)  mkŏ mjing leh klei bi tuôm amâo klă sĭt plah wah Khua phŭn bruă lĭng kahan ASEAN - Trung Quốc. Khua êpul Việt Nam - Thượng tướng Phan Văn Giang, Khua phŭn bruă lĭng kahan  ala čar drei nao hlăm klei bi kƀĭn. Blŭ hrăm hlăm klei bi kƀĭn, Thượng tướng Phan Văn Giang bi mni kơ bruă klam Trung Quốc leh anăn bi hgŭm răng mgang ala čar - klei êđăp ênang plah wah ASEAN-Trung Quốc hlăm wưng êgao, boh nik hlăm har Klei bi kƀĭn Khua phŭn bruă lĭng kahan ASEAN pŏk mlar (ADMM+) leh anăn Klei bi kƀĭn krĭng wăl ASEAN.

Kơ bruă Êa ksĭ Ngŏ, Khua phŭn bruă lĭng kahan Phan Văn Giang mtă dŭm tĭng brei mjing klei găl jăk kơ bruă bi trông Hdră bhiăn ngă bruă ti Ea ksĭ Ngŏ (COC), boh nik hlăm dŭm hdră msir mkŏ mjing klei đaŏ knang, bi ư̆ ăn dŭm bruă ngă, đăm ngă kơ boh klei rŭng răng hĭn ôh, msir mgaih klei bi mmiă hŏng hdră êđăp ênang, mơ̆ng tur knơ̆ng hdră bhiăn quốc tế, hlăm anăn mâo Klei kuôl kă Liên Hợp quốc kơ Hdră bhiăn Ea ksĭ thŭn 1982.

Pô mblang: H’Zawut Ƀuôn Yă