VOV4.Êđê- Đĭ hriê kơ prŏng hŏng kdrăp mnơ̆ng yua pơ̆k mñam mơ̆ng amĭ kyua anăn ayŏng Tưih ti ƀuôn Dur, să Glar, kdriêk Đăk Đoa, čar Gia Lai khăp êdi kơ dŭm mta êa mil mơ̆ng dŭm aruăt mrai pioh pơ̆k mñam. Klei khăp anăn mtrŭt leh ñu tui duah hdră êlan nao mrâo kơ dŭm mta mnơ̆ng mơ̆ng bruă pơ̆k mñăm djuê ana lehanăn bi sĭt klei čang hmăng ba mnơ̆ng mơ̆ng bruă pơ̆k mñam kbiă mơ̆ng krĭng ƀuôn sang.

Mđing uêñ kơ bruă mnơ̆ng pŏk mñam djuê ana hlăk dôk luič ram, Tưih mâo leh klei mĭn lŏ mkra mrâo kdrăp m’iêng ƀar hlăm hruê bi kuôl ung mô̆ hluê knhuah djuê ana jiă ênuk gưl mrâo. Dŭm blah m’iêng bi kuôl ung mô̆ mơ̆ng phung mniê mnuih djuê ana Bahnar ăt dưi pơ̆k mñam mơ̆ng aruăt mrai ƀiădah jiă knhuah ênuk mrâo čiăng mkăp djŏ hŏng klei čiăng mơ̆ng grăp čô mnuih, boh nik phung êdam êra.

Lač kơ klei mĭn mơ̆ng pô, ayŏng Tưih brei thâo: “Tal êlâo, kâo mâo klei mĭn snei kyua kâo čiăng lar bra knhuah dhar kreh djuê ana mâo mơ̆ng đưm mnuih Bahnar truh hŏng jih jang mnuih. Khă snăn, tơdah pô amâo jhŏng bi mlih snăn amâo djŏ knŏng dleh kriê pioh, ka lač ôh kơ klei bi lar bra, mđĭ kyar. Kyua anăn kâo mphŭn mkra m’iêng ƀar hlăm hruê bi kuôl ung mô̆ jiă knhuah djuê ana mguôp hŏng ênuk mrâo, kâo pô ăt tui ksiêm klă nik hlăm êlan mạng Internet, êlan hla pŏk web yang ƀuôn... Leh mkra dŭm mta kdrăp mnơ̆ng anei, kâo ƀuh mâo lu klei sa ai mơ̆ng jih jang mnuih”.

Ayŏng Tưih (dôk tal 2 mơng điâo truh kơ hnuă) yua kdrăp djuê ana čiăng mkra mjing m’iêng bi kuôl ung mô̆ hluê knhuah mrâo mrang

Ară anei, păt čiăng jih m’iêng ao ƀar hruê bi kuôl ung mô̆ mâo ami lehanăn amai ayŏng Tưih pơ̆k mñam hŏng kiê kngan, lehkơnăn phung tă kčoh mâo klei thâo ngă tă kčoh bi leh. Mta mnơ̆ng tal êlâo mâo ayŏng Tưih bi leh jing kdrăp čŭt h’ô hlăm hruê bi kuôl kơ amĭ ama ñu lehanăn ñu mă leh rup hưn mthâo hlăm hla pŏk web yang ƀuôn mâo leh ƀĭng găp dlăng, bi mni. Mbĭt anăn, hluẻ hŏng dŭm pŏk rup, ayŏng lŏ lar bra leh knhuah dhar kreh jăk siam mơ̆ng djuê ana Bahnar lehanăn klei jăk siam mơ̆ng ƀuôn sang ti anôk ayŏng dôk hdĭp.

Ayŏng Tưih lač snei: Pŏk rup amĭ ama ñu hưn mdah hlăm hla pŏk web yang ƀuôn mâo lu klei bi êdah jăk siam. Klei anei mjing leh boh kdrŭt kơ ñu mâo klei gĭr ktưn hĭn hlăm bruă ba mnơ̆ng pơ̆k mñam kpưn đĭ kbưi hĭn. Ară anei, mnuih ƀuôn sang ti alŭ wăl čar Gia Lai êmuh čiăng blei lu snăk. Mâo mnuih ti ala tač êngao ăt êmưh lehanăn čang hmăng dưi bi hgŭm bruă hrăm mbĭt mđĭ kyar bruă pơ̆k mñam kdrăp čŭt hô djuê ana ênuk mrâo. Khă snăn, kyua ka mâo lu klei thâo lehanăn ênoh prăk duh bi liê dôk kƀah, mbĭt anăn ñu čiăng lŏ mâo lu mmông ƀrư̆ brư̆ bi msiam hĭn kyua anăn ñu ka tŭ ư ôh.

 Ayŏng Tưih mbĭt hŏng amĭ ama hlăm rup kdrăp čŭt hơô dưi kčoh mơ̆ng kdrăp djuê ana 

Mơ̆ng thŭn 2020 truh kơ ară anei, ayŏng Tưih mă leh dŭm êtuh pŏk klei bi kuôl ung mô̆, pŏk ruo bi hdơr mơ̆ng dŭm čô čŭt kdrăp čŭt h’ô ñu pô kčĕ mkra. Mơ̆ng anăn, ayŏng mâo mơh lu phung mda asei mđing, sa ai, čŭt h’ô hưn mthâo dŭm kdrăp č’ŭt h’ô mơ̆ng ñu čiăng lar bra truh hŏng êpul êya lu hĭn, boh nik hlăm êpul êya mnuih djuê ana Bahnar, Jarai ti alŭ wăl čar Gia Lai./.

Pô mblang: Y-Khem Niê