VOV4.Êđê- Hlăm dŭm hrue kluôm lăn čar dôk bi hdơr 76 thŭn hrue kgŭ krŭ kdơ̆ng mlan 8, hrue mkŏ mjing lăn čar hrue 2/9, snăn klei ruă tưp covid 19 ăt adôk dleh dưi ksiêm dlăng. Mơak hlăm hrue knăm prŏng kơ lăn čar, phung ƀuôn sang Lăn Dap Kngư ăt mâo ai tiê prŏng prĭn mdrơ̆ng hŏng klei ruă tưp. Yăl dliê kơ klei anei, Y-Trơ̆p, djuê ana Mnông, ti Bon Jơ̆ng Plei, să Trường Xuân, kdriêk Dak Song, čar Daknông lač:

“Knăm lăn čar mâo klei êngiê, jing hruê knăm prŏng kơ lăn čar. Phung ƀuôn sang mâo klei mơak, êjai lăn čar knư̆ hrue knư̆ mâo klei đĭ kyar, klei hdĭp mda phung ƀuôn sang mâo klei bi mlih. Siămdah, kbiă hriê mơ̆ng klei ruă tưp ngă hmăi amâo mâo jăk mơh kơ klei hdĭp mda ala ƀuôn. Boh nik klei hdĭp phung ƀuôn sang dôk hlăm anôk mâo klei ruă tưp. Čiăng răng mgang asei mlei pô lehanăn găp djuê pô, lehanăn kơ jih jang yang ƀuôn, phung ƀuôn sang hlăm Bon hlue ngă kjăp mơh jih jang 5 mta klei mtă mơ̆ng phŭn bruă mdrao mgŭn, mâo ai tiê đua klam prŏng. Tơdah mâo mnuih amâo mâo thâo kral, mnuih mơ̆ng krĭng mâo klei ruă tưp wĭt, snăn bi nao hưn mtam hŏng anôk bruă djŏ tuôm. Dưn yua ai tiê thâo khăp kơ lăn čar, phung ƀuôn sang bi đru hdơ̆ng găp djam mta, boh kroh, bi mơĭt kơ dŭm čar Bình Dương, Đồng Nai, ƀuôn prŏng Hồ Chí minh hŏng klei čang hmăng bi đru klei dleh dlan, lehanăn čiăng pral dưi msưh kdŭn, jih jang mnuih lŏ wĭt hŏng klei hdĭp msĕ si aguah tlam”./.

Đăo knang kơ klei Đảng, knŭk kna kiă kriê hlăm bruă mdrơ̆ng hŏng klei ruă tưp Covid 19, hŏng ai tiê “Mdrơ̆ng hŏng klei ruă tưp msĕ si bi kdơ̆ng hŏng roh, Rmah Čư̆t, djuê ana Jrai, ti ƀuôn Thong A, să Ia Hrŭ, kdriêk Čư̆ Pưh, čar Gialai lač:

“leh klei ruă tưp bluh đĭ, phung ƀuôn sang hlue ngă 5 mta klei mtă. Bruă sang čư̆ êa să, ƀuôn kreh mtă mtăn nanao kơ phung ƀuôn sang kơ bruă răng hŏng klei ruă tưp. Phung ƀuôn sang čang hmăng srăng jih pral klei ruă tưp. Hơêč hmưi kơ phung ƀuôn sang pô dôk hlăm krĭng mâo klei ruă tưp răng kriê bi kjăp klei suaih pral pô”./.

Pô mblang: H’Nêč Êñuôl