VOV4.Êđê - Blŭ hrăm ti anôk bi tuôm, mă bruă hŏng 70 čô ngă bruă kreh knhâo, phung nai prŏng, nai prĭn, phung khua kiă kriê anôk bruă mdrao mgŭn, Khua knŭk kna Phạm Minh Chính mñă klă: Klei đru mguôp yuôm bhăn hlăm anôk bruă mdrao mgŭn hlăm hdră kriê dlăng klei suaih pral mơ̆ng mnuih ƀuôn sang. Đảng, knŭk kna lehanăn mnuih ƀuôn sang hdơr knga nanao kơ êpul knuă druh kreh knhâo anôk bruă mdrao mgŭn mơ̆ng dŭm ênuk gưl, boh nik hlăm wưng dôk bluh mâo klei ruă Covid 19

Mphŭn pŏk klei bi tuôm, Khua knŭk kna bi êdah klei bi mni, mbĭt anăn čang hmăng mđing hmư̆, tŭ mă klei mĭn mkra mđĭ djŏ guôp. Hĭn mơh, Khua knŭk kna čang hmăng snăk phung nai mtô, phung kreh knhâo mâo klei thâo hlăm hdră gang mkhư̆ klei ruă tưp ksiêm hriăm mkra mjing, vaccin gang mkhư̆ Covid-19, mơ̆ng tur knơ̆ng anăn drei bi tŭ ư mâo hdră msir bi djŏ guôp čiăng msưh kdŭn klei ruă Covid-19. Khua knŭk kna čang hmăng phung kreh knhâo pioh lu mmông mđing mguôp klei blŭ.

Hlăm klei bi kƀĭn, lu phung kreh knhâo mâo klei blŭ mguôp leh anăn bi êdah klei mgei ai tiê leh mâo klei mđing dlăng, kah mbha mơ̆ng Đảng, Knŭk kna leh anăn mnuih ƀuôn sang; bi êdah klei jih ai tiê myơr kơ bruă mdrao mgŭn knŭk kna, boh nik hlăm boh klei ruă tưp Covid-19 ară anei, lu phung kreh knhâo hlăk mâo klei đru mguôp jăk hlăm bruă gang mkhư̆ klei ruă tưp. Phung kreh knhâo hưn mdah hŏng Khua knŭk kna dŭm klei gĭr ktưn, klei mĭn mbruă hlăm klei mđĭ boh tŭ dưn ksiêm mkă, bi ksiêk phung F0, F1, răng mgang krĭng mtah leh anăn mdrao phung F0 leh anăn mâo dŭm klei kčĕ, klei akâo čiăng mđĭ klei tŭ dưn gang mkhư̆ klei ruă tưp. Nai prŏng nai prĭn Nguyễn Thanh Bình Khua Sang hră gưl prŏng êa drao Hà Nội lač brei hluê ngă bi jăk dŭm hdră msir knŭk kna kčah leh.“Kơ hdră mơ̆ng drei ba yua klei gĭt gai mơ̆ng Knŭk kna, Phŭn bruă mdrao mgŭn hmei lač djŏ, drei kƀĭn hlăm bruă gang mkhư̆ leh anăn mdrao klei ruă; gang mkhư̆ klei ruă mâo bi ktlah hjăn, 5 klei mtă, drei ba yua leh. Drei mâo vaccin ăt pŏk ngă; mdrao klei ruă mâo êa drao.”

Nai prŏng nai prĭn Lê Văn Truyền - Khua Êpul hgŭm kčĕ hră akâo ba yua êa drao, mnơ̆ng pioh mkra mjing êa drao snăn brei drei iêô jak êpul mă bruă mơ̆ng dŭm knơ̆ng bruă mkra mjing êa drao hlăm ala čar kƀĭn mkra mjing êa drao mdrao klei ruă Covid-19. “Drei iêo jak êpul mkra mjing êa drao hlăm ala čar drei mâo giăm 300 boh sang mkra mjing, gĭr duah mnơ̆ng dhơ̆ng pioh mkra mjing êa drao mdrao Covid-19 mâo dlông rŏng lăn tŭ yap.”

Blŭ hrăm klah čŭn klei ƀi kƀĭn, Khua knŭk kna Phạm Minh Chính mñă klă 2 boh phŭn jing klei đru mguôp mơ̆ng phung ksiêm hriăm hlăm bruă mdrao mgŭn hŏng bruă răng mgang, kriê dlăng klei suaih pral yang ƀuôn leh anăn đru mguôp kơ dŭm klei gĭr ktưn gang mkhư̆ klei ruă Covid-19 ti ala čar drei. Khua knŭk kna lač klei đru mguôp prŏng prĭn mơ̆ng bruă mdrao mgŭn hŏng hdră gang mkhư̆ klei ruă Covid-19 ti ala čar drei giăm 2 thŭn êgao. Khua knŭk Khua Knŭk kna brei thâo, mta phŭn čiăng drei msưh kdŭn, tŭ dưi hŏng klei ruă tưp dưi dlăng hlăm 3 boh phŭn: Klei gĭr mơ̆ng jih bruă kđi čar, mnuih ƀuôn sang sa ai tiê; ba yua dŭm hdră kreh knhâo gang mkhư̆ klei ruă tưp, mkăp pioh vaccin leh anăn dŭm hdră mdrao mgŭn hŏng êa drao. Bruă mdrao mgŭn jing kmeh gơ̆ng yuôm bhăn hlăm bruă gang mkhư̆ klei ruă tưp hŏng klei kreh knhâo bi gang mkhư̆, đru mguôp kơ klei ksiêm hriăm, mkra mjing vaccin leh anăn êa drao mdrao kơ phung ruă.

Khua knŭk kna lač klă, čiăng tŭ dưi hŏng klei ruă Covid-19 leh anăn lu klei ruă tưp mkăn, Knŭk kna čiăng kơ klei gĭr ktưn hĭn mơ̆ng êpul thơ̆ng kơ bruă, phung kreh knhâo čiăng mđĭ kyar bruă mdrao mgŭn Việt Nam đĭ kyar sa hnơ̆ng mrâo. Hlăm anăn brei bi mklă bruă mdrao mgŭn drei jing klei mdrao mgŭn kreh knhâo, djuê ana, ngă bruă kyua mnuih ƀuôn sang, bruă mdrao mgŭn jing phŭn, mdrao mgŭn jing tur knơ̆ng, mdrao mgŭn mtăp mđơr leh anăn bi kna hŏng bruă mdrao mgŭn hlăm êpul êya, mguôp hŏng klei mdrao mgŭn hluê ênhiang djuê ana hŏng klei mdrao mgŭn mrâo mrang, sang êa drao  kahan bi mguôp hŏng klei mdrao mgŭn hlăm ƀuôn sang, mdrao mgŭn hlăm ala čar bi mguôp hŏng êngao ala čar. Hŏng êpul kreh knhâo, Khua knŭk kna mtă: “Ti anăp klei hin vaccin leh anăn êa drao mdrao klei ruă Covid-19 ară anei snăn mtă kơ phung kreh knhâo, phung thơ̆ng kơ bruă ba yua jing hnơ̆ng klei bi hgŭm hŏng phung kreh knhâo, êpul bruă kreh knhâo dlông rŏng lăn čiăng tui duah phŭn mkăp vaccin, êa drao mdrao Covid-19 kơ Việt Nam leh anăn ktrâo lač ksiêm mkă mdrao klei ruă Covid-19 kơ mnuih ƀuôn sang hlăm dŭm kdrăp hâo hưn.”

Boh nik hlăm bruă gang mkhư̆ hâo hưn Khua knŭk kna mtă, phung thơ̆ng kơ bruă, phung kreh knhâo brei đru êpul êya čiăng hâo hưn klă, kreh knhâo kơ dŭm hdră msir gang mkhư̆ klei ruă tưp. “Phung thơ̆ng kơ bruă, phung kreh knhâo mđĭ lar hĭn bruă klam leh anăn kơhưm pô hlăm bruă đru đru kơ êpul êya klei hâo hưn čiăng bi lar bra, hlak mblang bi klă hŏng mnuih ƀuôn sang kơ klei kreh knhâo mâo dŭm hdră msir gang mkhư̆ klei ruă tưp mơ̆ng phung drei, klei anei snăn amâo mâo ôh phung dưi lač djŏ ai êngao kơ diñu. Kâo čang hmăng phung aê mdrao si bĕ ngă čiăng kơ mnuih ƀuôn sang thâo. Tal dua si bĕ ngă čiăng kơ mnuih ƀuôn sang thâo săng, tal tlâo si bĕ ngă čiăng kơ mnuih ƀuôn sang đaŏ. Tal pă jing si bĕ ngă čiăng kơ mnuih ƀuôn sang ư ai, tal êma mnuih ƀuôn sang hrăm mbĭt đru ngă. Êma klei anei snăn mtă kơ phung ksiêm hriăm ngă leh, dôk ngă, čang hmăng phung aê mdrao ngă lu hĭn, ktang hĭn.”

Khua knŭk kna čang hmăng grăp čô mnuih, êpul bruă, phung kreh knhâo hlăm bruă mdrao mgŭn hlăm leh anăn êngao čar, mđĭ lar knhuah gru sui thŭn leh anăn hŏng klei thâo, gĭr jigh ai tiê, bruă klam lŏ dơ̆ng hrăm mbĭt, sa ai tiê, hŏng bruă ngă jih ai tiê, klă sĭt, tŭ dưn, gĭr hŏng kluôm ala tŭ dưi hŏng klei ruă Covid-19, răng mgang klei hdĭp, klei suaih pral kơ mnuih ƀuôn sang, hnưm ba klei hdĭp lŏ msĕ aguah tlam leh anăn krŭ wĭt, mđĭ kyar bruă duh mkra ala ƀuôn./.