VOV4.Êđê- Čư̆ Êlang jing să krĭng raih kbưi kdriêk Ea Kar, čar Dak Lak, bi knông hŏng să Vụ Bổn, kdriêk Krông Pač, să Čư̆ Pui, kdriêk Krông Bông leh anăn să Čư̆ Bông, kdriêk Ea Kar. Jih 3 să bi knông mâo sơaĭ mnuih ruă Covid-19 hlăm êpul êya.  Hjăn Čư̆ Êlang ti krah 3 să mâo klei ruă tưp, ƀiădah kyua klei sa ai mơ̆ng mnuih ƀuôn sang hŏng dŭm hdră gang mkhư̆ klei ruă tưp mơ̆ng bruă sang čư̆ êa, să amâo čih yap ôh mnuih ruă Covid-19, krơ̆ng kjăp mđĭ kyar bruă duh mkra ala ƀuôn.

Anôk bi ktlah mbĭt ti sang gĭt gai knơ̆ng mkăp êa Ea Rơt kbưi hŏng wăl mnuih ƀuôn sang ƀiădah dlăng ăt krưh k’ăng mơh. Anei jing anôk bi ktlah hŏng phung anak aneh mơ̆ng Čư̆ Êlang mrâo wĭt mơ̆ng dŭm čar krĭng dhŭng čiăng gang mkhư̆ klei ruă tưp Covid-19. Ngă bruă klam ti nei, k’iăng khua anôk bruă mdrao mgŭn să Čư̆ Êlang amai Nguyễn Thị Yến brei thâo, hlăm să mâo 2 anôk bi ktlah mbĭt ti sang hră gưl 2 Phạm Hồng Thái lehanăn sang hră gưl 1 Nguyễn Thái Học. Hruê mmông knhal jih mlan 7 thŭn 2021, jih 2 anôk bi ktlah ngă klei bi ktlah kơ 208 čô mrâo wĭt mơ̆ng anôk mâo klei ruă tưp. Dưi mâo mnuih ƀuôn sang lehanăn phung mâo ai tiê kmah đru bi mguôp mnơ̆ng ƀơ̆ng, đru kơ grăp čô mâo klei hơĭt leh anăn ngă jăk bruă bi ktlah 14 hruê, lehanăn lŏ wĭt bi ktlah ti sang thiăm 14 hruê. Ti knhal jih mlan 8, knŏng dôk mă 10 čô dôk bi ktlah mbĭt, dưi mbĕ mđuê̆ ba bi ktlah ti sang gĭt gai knơ̆ng mkăp êa Ea Rơt, ba wĭt sang hră mơar čiăng bi doh kman mprăp kơ thŭn hriăm mrâo. Amai Nguyễn Thị Yến lač, kyua klei sa ai mơ̆ng mnuih ƀuôn sang lehanăn êpul êya ngă bruă ti Čư̆ Êlang dưi gang mkhư̆ amâo brei klei ruă tưp Covid-19 mŭt hlăm să:

“Să tiŏ nao leh jih jang êpul Covid hlăm yang ƀuôn, bruă mdrao mgŭn alŭ ƀuôn, êpul cŏng ksiêm dlăng… sĭt hmao ƀuh mnuih mrâo wĭt mơ̆ng anôk mâo klei ruă tưp, sitôhmô să Vụ Bổn, Čư̆ Bông srăng hưn mthâo mtam, boh sĭt jih jang jăk sơăi. Msĕ hŏng mrâo anei, mâo 2 čô mơ̆ng Čư̆ Bông huă mnăm kpiê êsei jing diñu hmao ƀuh lehanăn ba bi ktlah mbĭt. Knơ̆ng bruă mdrao mgŭn ngă nanao bruă hâo hưn, bi kơ mnuih ƀuôn sang ti nei mâo klei thâo săng, boh nĭk jing mnuih djuê ƀiă diñu ngă jăk bruă, amâo dêč đuê̆ anôk anei anôk dih ôh.”

Phung mơ̆ng dŭm alŭ wăl mkăn nao ti Čư̆ Elang hưn klei suaih pral

Djŏ msĕ si k’iăng khua kiă kriê anôk bruă mdrao mgŭn să Čư̆ Êlang, klei thâo sang mơ̆ng mnuih ƀuôn sang dưi gang mkhư̆ klei ruă tưp mâo boh tŭ dưn. Êjai ka mâo ôh anôk bi ktlah mbĭt, phung mrâo wĭt mơ̆ng anôk mâo klei ruă tưp ăt ngă jăk bruă bi ktlah ti sang. Êjai dŭm alŭ wăl bi hrŏ klei êrô êbat, mnuih ƀuôn sang hlăm să mtă kơ anak aneh pô hŏng êlan đĭng blŭ mđĭ ai lač kơ diñu đăm wĭt ôh, ngă jăk klei bi kbưi yang ƀuôn čiăng amâo bi mtưp klei ruă, Ayŏng Vàng Seo Pao, ti wăl ƀuôn sang mrâo dôk mrô 1 - knơ̆ng mkăp êa akŏ Krông Pač, să Čư̆ Êlang brei thâo:

“Tơdah wĭt ăt srăng bi ktlah mơh, ti anăn ăt dôk bi ktlah mơh, tui si 2 ung mô̆ hmei mĭn, brei anak dôk ti năn yơh, leh jih klei ruă tưp lŏ wĭt nao mă bruă. Jing mđĭ ai anak aneh dôk ti năn srăng ngă jăk bruă, amâo dưi nao hiu anôk mkăn ôh.”

Klei êđăp ênang ti wăl anôk dôk mrâo mrô 1 Čư̆ Elang

Tui si Trần Văn Thanh, khua kiă kriê bruă sang čư̆ êa să Čư̆ Êlang, hlăm 11 alŭ, ƀuôn mơ̆ng să, wăl mnuih ƀuôn sang mrâo wĭt dôk mrô 1 jing dôk mâo klei knap mñai hĭn, kyua mâo đa đa mnuih ƀuôn sang mrâo đuê̆ mơ̆ng alŭ ênao êa să Čư̆ San (Kdriêk Mdrak). Kơ bruă gang mkhư̆ klei ruă tưp Covid-19, să tiŏ nao leh êpul êya ngă bruă ti nei, mk mjing 10 êpul đru rŭ mdơ̆ng sang dôk, tui si ai tiê “Mnuih ƀuôn sang hriê êlâo đru kơ mnuih ƀuôn sang hriê êdei”. Hlăm kluôm alŭ wăl, să dưi bi lar bruă klam mơ̆ng mnuih ƀuôn sang mbĭt hŏng dŭm êpul êya bruă mdrao mgŭn, kahan ƀuôn, kahan ksiêm hlăm să, ksiêm dlăng kjăp mnuih mŭt kbiă, ngă jăk bruă hưn mdah bruă mdrao mgŭn. Klei sa ai mơ̆ng mnuih ƀuôn sang dưi đru kơ să Čư̆ Êlang dưi gang mkhư̆ amâo brei klei ruă tưp mut hlăm alŭ wăl, khă dôk ti krah 3 alŭ wăl mâo klei ruă tưp jing să Vụ Bổn, kdriêk Krông Pač, să Čư̆ Pui, kdriêk Krông Bông lehanăn să Čư̆ Bông kdriêk Ea Kar. Trần Văn Thành lŏ lač klă hĭn:

“Bi kơ bi knông hŏng să Vụ Bổn ară anei hmei dôk rơ̆ng kjăp 4 êpul gak răng, mâo dŭm êpul êya hlăm êpul ksiêm dlăng alŭ ƀuôn, ƀuôn lehanăn kahan ksiêm să mtă amâo dưi brei mnuih ƀuôn sang hlăm anôk dôk ngă klei bi kbưi yang ƀuôn tui si asăp mtrŭn mrô 16 nao hlăm alŭ wăl. Hŏng anôk bi knông hŏng să Čư̆ Bông hmei mâo dŭm êpul hiu gak răng. Hlăm să mâo 50 êpul Covid yang ƀuôn, grăp êpul mâo bruă klam ksiêm dlăng mơ̆ng 30 truh kơ 50 gŏ sang tui si ênoh gŏ sang hlăm alŭ ƀuôn. Klei klei ksiêm dlăng grăp êpul srăng hưn mthâo nanao hlăm zalô, sitôhmô ti pô ñu dôk bi ktlah, dŭm êpul srăng thâo sơăi, êpul ksiêm dlăng alŭ ƀuôn thâo, tơdah hmao ƀuh diñu amâo ngă jăk amâo dah amâo mâo ôh klei bi knăl hmei srăng tiŏ nao êpul nao bi mklă wăt kơ yang hruê amâo dah mmăt mlam.”

Dưi lač, hŏng dŭm hdră êlan ngă ktang phĭt mơ̆ng bruă sang čư̆ êa alŭ wăl, klei sa ai mơ̆ng mnuih ƀuôn sang dŭm djuê ana, să Čư̆ Êlang, kdriêk Ea kar, čar Dak Lak ăt dôk rơ̆ng kjăp klei êđăp ênang rang mgang “Anôk mtah” ti krah dŭm anôk hrah Covid 19, đru kơ mnuih ƀuôn sang mâo klei hơĭt hlăm klei hdĭp.

Pô mblang: Y-Ƀel Êban