VOV4.Êđê - Leh 5 thŭn truh hdră kñăm krĭng ƀuôn sang mrâo, să Dă Kho, kdriêk Dă Teh, čar Lâm Đồng klă sĭt bi mlih. Bruă duh mkra lŏ dơ̆ng đĭ kyar jăk, dŭm gru hmô dưi mkŏ mjing leh anăn ba wĭt klei tŭ dưn jăk… Dŭm ktuê êlan tuh bê tông doh siam dưi lŏ bi msian hŏng êa mil mnga jăk siam dua nah. Sang dhar kreh, sang hră, đang mnga prŏng siam ngă leh lehanăn hlăk dưi rŭ mdơ̆ng… Dŭm mta anăn mjing kơ krĭng ƀuôn sang dlăng msĕ si sa pŏk rup jăk siam ti krĭng ƀuôn sang kdriêk Dă Teh, čar Lâm Đồng.

Hmei truh leh ti să Dă Kho, giăm yang hruê dơ̆ng, mnuih ƀuôn sang ti lŭ 5, 6 ăt dôk hlăm klei mă bruă. Mâo mnuih dôk hlăm bruă kih wač, sa êpul mnuih rŭ mdơ̆ng sang dôk hlăm ƀuôn sang, dôk mă dŭm bruă bi lŭk xi măng, lang brĭk… čiăng rŭ mdơ̆ng sa war mnga điêt ti sang dhar dreh hlăm ƀuôn. Ti krah mđiă ktang, bruă ngă mâo klei suăi ƀiădah hŏng klei hur har lehanăn sa ai, mnuih ƀuôn sang lŏ mâo sa anôk siam čiăng mâo lu bruă ngă grăp hruê, kyuanăn ăt hur har mă bi leh bruă pô.

Lŏ hdơr kơ dŭm hruê kčưm hlăm bruă mkŏ mkra krĭng ƀuôn sang mrâo, aduôn Nguyễn Thị Hiền, khua bruă Đảng ti alŭ 6, să Dă Kho bi êdah: hlăm hruê mmông mtrŭt mjhar bruă mkŏ mkra krĭng ƀuôn sang mrâo, să Dă Kho tuôm hŏng lu klei dleh dlan, alŭ 6 jing anôk mâo klei knap mñai hĭn hlăm să. Ƀiădah ară anei, 2 nah djiêu êlan hlăm să, alŭ, lehanăn hŏng lu boh sang tôl sô siă hlăk anăn, ară anei dưi mlih jing dŭm boh sang siam lehanăn kdrăp k’ah. Dŭm bĭt êlan lăn, kdlŭt hlăm yan hjan ară anei jing dŭm bĭt êlan gŭ drŏng lehanăn êlan pê tông, êlan klông doh siam, mnga blang djăp yan.

 Mơ̆ng hruê tui ngă bruă mkŏ mkra krĭng ƀuôn sang mrâo, bruă sang čư̆ êa să mâo leh klei tă êlan, hâo hưn, mkŏ mjing dŭm hdră truh kơ grăp alŭ kơ bruă răng mgang wăl hdĭp mda… ƀuh klă bruă klam hlăm bruă răng mgang wăl hdĭp mda lehanăn bruă mkŏ mkra krĭng ƀuôn sang mrâo, mnuih ƀuôn sang mâo klei hur har nao hgŭm hlăm lu bruă ngă klă klơ̆ng čiăng đĭ kyar wăl hdĭp mda mtah. Dŭm êpul êya mơ̆ng dŭm alŭ lŏ dưi rŭ mdơ̆ng lu adŭ hriăm čiăng mđĭ klei thâo săng kơ wăl hdĭp mda lehanăn klei jhat mơ̆ng djah djâo.

Nguyễn Trọng Hiệp, khua bruă Đảng ti să Dă Kho brei thâo: leh 5 thŭn hŏng anei mâo klei mkŏ mkra krĭng ƀuôn sang mrâo, bruă anei jing leh bruă ngă hlăm bruă kđi čar lehanăn yang ƀuôn, boh nĭk mâo klei sa ai mơ̆ng mnuih ƀuôn sang hlăm să. Mnuih ƀuôn sang dưi bi lar bruă klam jing phŭn, kmeh gơ̆ng hlăm bruă mkŏ mkra krĭng ƀuôn sang mrâo msĕ si: nao hlăm bruă mkŏ mkra tui hluê hdră êlan “mnuih ƀuôn sang mkŏ mkra, knŭk kna đru mnơ̆ng mnuă, nao hgŭm lehanăn bi leh dŭm hnơ̆ng čuăn kơ krĭng ƀuôn sang mrâo, boh nĭk hlăm dŭm hnơ̆ng čuăn kơ lăn mnga lehanăn wăl hdĭp mda.

Čiăng dưi ngă dŭm hnơ̆ng čuăn kơ wăl mnga lehanăn wăl hdĭp mda, êpul bruă Đảng ti să Dă Kho kčĕ leh kơ dŭm anôk bruă, êpul bruă kđi čar - yang ƀuôn srăng mâo klei mkŏ mkra ƀiă êdi sa klei bi hmô kơ wăl mnga lehanăn wăl hdĭp mda, bruă sang čư̆ êa ăt srăng mkŏ mjing hdră êlan hâo hưn, mtrŭt mjhar mnuih ƀuôn sang jing pô đru hlăm bruă wăl hdĭp mda mơ̆ng dŭm bruă ngă mơ̆ng să, alŭ mtrŭt mjhar. Tui hluê anăn srăng đru kơ dŭm čô knuă druh, mnuih ƀuôn sang srăng mâo klei mưng răng mgang klei doh hlăm sang dôk lehanăn hlăm êlan klông.

Mâo hră bi êdah, êpul hlăm bruă lŏ hma să Dă Kho dôk mâo 2 klei bi hmô kơ bruă răng mgang wăl hdĭp mda jing: hiu duah mă kpŭng ksu, hruh êa drao mgang kơ ana kyâo lehanăn klei bi hmô mă djah djâo mjing prăk kăk. Klei bi hmô pla mnga 2 nah êlan mơ̆ng êpul phung mniê hlăm să, klei bi hmô ksiêm dlăng êlan klông mơ̆ng êpul hđeh êdam êra hlăm să hŏng boh tiah 7 km ti êlan mdơ̆ng mgăn hlăm alŭ. Dŭm klei bi hmô anei mâo klei nao hgŭm mơ̆ng 4.500 čô mnuih. Êngao kơ năn, bruă mặt trận lehanăn dŭm êpul êya hlăm să Dă Kho mâo nanao bruă hâo hưn, mtrŭt mjhar kơ dŭm čô mă bruă lehanăn mnuih ƀuôn sang srăng nao hlăm bruă kih wač bi doh wăl hdĭp mda hlăm dŭm bruă čung ba mnuih ƀuôn sang msĕ si: gŏ sang 5 amâo mâo, 3 doh, mkŏ mkra dŭm bĭt êlan amâo mâo djah djâo, boh êlan mâo mnga mtah - doh - siam.

Mơ̆ng dŭm bruă anăn, truh kơ ară anei, kluôm hlăm să mâo êbeh 50% bĭt êlan hlăm să lehanăn alŭ mâo êlan mđuê̆ êa, dưi pla ana kyâo amâo dah mnga ti 2 nah êlan. Êbeh 85% gŏ sang rông mnơ̆ng dhơ̆ng hlăm alŭ wăl mâo war rông mnơ̆ng dưi rơ̆ng kơ klei doh hlăm wăl hdĭp mda, 100% sang mnia blei hlăm să dưi ngă bruă mgaih msir dhah djâo, êa čhŏ djŏ hŏng hnơ̆ng čuăn lehanăn anăn mâo klei hơĭt kjăp. Djah djâo yua hlăm grăp hruê, djah djâo khăng hlăm dŭm anôk mkŏ mkra mnơ̆ng dhơ̆ng mơ̆ng bruă lŏ hma dưi mâo klei bi mklin sa anôk hlăm dŭm anôk djŏ hŏng hdră bhiăn.

 Nguyễn Trọng Hiệp, k’iăng khua bruă Đảng hlăm să Dă Kho mñă klă:“Čiăng kơ bruă răng mgang wăl hdĭp mda dưi lŏ ngă jăk hĭn, dŭm hruê mmông kơ anăp, să Dă Kho srăng lŏ čuê dŭm bruă ngă bi mdoh wăl hdĭp mda lu hĭn lehanăn nanao. Mbĭt hŏng anăn lŏ mtrŭt mjhar bruă hâo hưn kơ mnuih ƀuôn sang dưi thâo săng klă lehanăn ngă djŏ bruă bi mdoh wăl hdĭp mda hlăm klei hdĭp grăp hruê, anôk rông mnơ̆ng dhơ̆ng, anôk mâo lu mnuih. Rơ̆ng kơ bruă bi mdoh wăl hdĭp mda hlăm dŭm knăm 7 grăp hruê kăm hlăm sŭm alŭ, sang hră lehanăn anôk mnia blei.