VOV4.Êđê- Bi hdơr 100 thŭn hruê kkiêng Lê Quang Đạo (8/8), aguah anei, hruê 7/8, Sang hră ksiêm hriăm kơ bruă kđi čar ala čar Hồ Chí Minh bi hgŭm hŏng Anôk bruă kiă kriê klei hâo hưn gưl dlông, Adŭ bruă kƀĭn ala lehanăn bruă Đảng čar Bắc Ninh mkŏ mjing leh Klei bi kƀĭn trông kreh knhâo gưl ala čar hŏng anăn “ Lê Quang Đạo hŏng hdră bruă kgŭ krŭ kdơ̆ng Việt Nam lehanăn ƀuôn sang Bắc Ninh”. Klei hdĭp lehanăn hdră mă bruă mơ̆ng Lê Quang Đạo siă suôr hŏng dŭm klei bi mlih prŏng mơ̆ng ala čar hlăm êbeh 60 thŭn knhal jih eneuk gưl tal 20. Găn lu bruă ngă, khădah mă ya bruă, hlăm ya boh klei, ñu ăt gĭr ktưn, jih ai tiê bi leh bruă klam mâo kčah jao. Hŏng bruă klam jing Khua bruă kƀĭn ala, ñu đru mguôp leh hlăm hdră êlan mlih mrâo mơ̆ng Đảng hlăm klei mă bruă mơ̆ng Anôk bruă kƀĭn ala, boh nik jing bruă mtrŭt mđĭ klei čih mkra hdră bhiăn phŭn lehanăn klei bhiăn kñăm bi sĭt Hdră mtrŭn mơ̆ng Đảng, djŏ hŏng klei čiăng kriê dlăng ala čar hŏng hdră bhiăn./.

Pô mblang: H’Nêč Êñuôl