VOV4.Êđê- Hruê anei 20/7, klei kƀĭn tal 1, bruă kƀĭn ala gưl 15 dưi kčưm pŏk ti sang bruă kƀĭn ala. Hlăm êbeh 11 hruê mă bruă, bruă kƀĭn ala čuăn yua 3 hruê kơ bruă mprăp mnuih mă bruă knŭk kna, bi klă lehanăn bi leh bruă ngă kơ dŭm čô khua êmua hlăm dŭm anôk bruă knŭk kna, hlăm anăn mâo khua lăn čar, khua knŭk kna lehanăn khua bruă kƀĭn ala. Ksiêm dlăng bi trông kơ dŭm klei hưn mdah kơ bruă duh mkra ala ƀuôn lehanăn dŭm boh klei yuôm bhăn mkăn. Tui sui hdră êlan, ti aguah leh khua bruă kƀĭn ala gưl 14 Vương Đình Huệ blŭ pŏk kčưm klei bi kƀĭn.

Khua gĭt gai Đảng Nguyễn Phú Trọng srăng mâo klei blŭ yuôm bhăn. Leh kơ anăn, bruă kƀĭn ala srăng kƀĭn hjăn čiăng ksiêm dlăng hlăm bruă mnuih mă bruă, bi klă tui si hdră mtrŭn kơ ênoh k’iăng khua kiă kriê bruă kƀĭn ala, ênoh khua êmua hlăm dhar bruă kƀĭn ala mrâo. Ti tlam, dŭm čô bi ala srăng mplĕ hră hgăm čuăn ruah khua bruă kƀĭn ala mrâo. Tui si klei bhiăn khua bruă kƀĭn ala mrâo srăng ƀuăn rơ̆ng siă suôr hŏng ala čar, hŏng mnuih ƀuôn sang lehanăn klei bhiăn ala čar. Leh kơ anăn mtam, bruă kƀĭn ala srăng ngă klei čuăn ruah 4 k’iăng khua bruă kƀĭn ala lehanăn 12 čô khua êmua hlăm dhar bruă gĭt gai bruă kƀĭn ala.

Pô mblang: Y-Ƀel Êban