Ară anei EVNGENCO1 hlăk dôk kiă kriê lu sang bi êran pui kmlă hŏng ai êa prŏng ti  Lâm Đồng msĕ si Đại Ninh, Đồng Nai 3, Đồng Nai 4, Đa Nhim, Hàm Thuận - Đa Mi lehanăn anôk bi êran pui kmlă hŏng pil yang hrue ti ênao  Đa Mi, hŏng hnơ̆ng dưi bi êran jih jang truh 1.615 MW.

Lŏ dơ̆ng hlăm bruă mđĭ kyar pui kmlă hŏng pil yang hrue, EVNGENCO1 akâo duh bi liê thiăm 3 mta bruă bi êran pui kmlă hŏng pil yang hrue ti Lâm Đồng mâo: Sang bi êran pui kmlă hŏng pil yang hrue ti ênao mgơ̆ng êa Đại Ninh hŏng ai ktang hlăm brô  96 MW, hŏng ênoh duh bi liê hlăm brô 1.600 êklai prăk, bruă bi êran pui kmlă hŏng pil yang hrue ti ênao Hàm Thuận wưng tal 1 hŏng hnơ̆ng 100 MW, ênoh bi liê jih jang hlăm brô 1.650 êklai prăk, lehanăn sang bi êran pui kmlă ti ênao Đa Mi wưng tal 2 hŏng hnơ̆ng 70 MW, ênoh duh bi liê jih jang tui si tĭng hlăm brô 1.150 êklai prăk. Jih jang dŭm bruă mkra mjing mâo leh klei ksiêm duah, mơ̆ng klei dưn yua ƀô̆ êlah êa mơ̆ng dŭm boh ênao êa dưi mâo, djŏ guôp hŏng hdră êlan mđĭ kyar bruă mkra phŭn pui hŏng pil yang hrue mơ̆ng knŭk kna lehanăn tă êlan mđĭ kyar phŭn pui doh./.