Klei hưn mâo Phŭn bruă Lŏ hma lehanăn Wăl hdĭp mda ba mdah ti Anôk bi kƀŏn “Mtô mblang dŭm klei hâo hưn kơ hdră doh êƀăt mnơ̆ng dhơ̆ng lehanăn ksiêm dlăng mnơ̆ng rông, mnơ̆ng pla mjing hlăm Klei kuôl kă Ƀĭng hgŭm bruă duh mkra kluôm krĭng wăl RCEP lehanăn Hdră mtrŭn mrô 280 mơ̆ng China”, hruê 14/5. Klei kƀĭn dưi mkŏ mjing ti Dak Lak lehanăn online truh hŏng 34 anôk hlăm gưl dlông lehanăn dŭm čar, ƀuôn prŏng hlăm kluôm ala. Hluê si klei hưn, wưng êgao, dŭm anôk bruă duh mkra pral mdrơ̆ng hŏng klei amâo hơĭt hlăm wăl anôk mnia mblei, bi leh jăk bruă kuôl kă blei mnơ̆ng. Dŭm êpul dôk mprăp bi mklă mrô krĭng pla, ksiêm dlăng lehanăn bi mklă phŭn agha anôk pla mjing kñăm mkăp djŏ hŏng dŭm klei kčah mtrŭn mrâo mơ̆ng wăl anôk mnia mblei, boh nik dŭm klei kčah mtrŭn kuôl kă mnia mblei.

 Khă snăn, mnơ̆ng lŏ hma Việt Nam dôk tlă anăp hŏng dŭm klei kčah mtrŭn ƀrư̆ hruê ƀrư̆ kjăp kơ klei doh êƀăt mnơ̆ng dhơ̆ng. Boh nik, tĭng China dôk mđĭ hdră ksiêm dlăng klei blei mnơ̆ng mơ̆ng ala tač êngao, mđing kơ mrô krĭng pla, anôk đŭn hruh, ksiêm dlăng hnơ̆ng êa drao răng mgang mnơ̆ng pla mjing, hruh mƀlir lehanăn bi mklă phŭn agha anôk pla mjing. Klei kƀĭn anei mkăp leh dŭm klei hâo hưn, klei kčah mtrŭn mrâo kơ klei doh êƀăt mnơ̆ng dhơ̆ng lehanăn ksiêm dlăng mnơ̆ng rông, mnơ̆ng pla (SPS) hlăm klei kuôl kă Ƀĭng hgŭm bruă duh mkra kluôm dhuôm ti krĭng wăl; hdră mtrŭn mrô 280 lehanăn dŭm klei hưn mơ̆ng Knơ̆ng bruă mŭt kbiă China kơ hdră kriê dlăng anôk bruă mkra mnơ̆ng blei mnơ̆ng dhơ̆ng mơ̆ng ala tač êngao mŭt hlăm wăl anôk mnia mblei China čiăng kơ phung kriê dlăng, anôk bruă duh mkra, êpul hgŭm bruă, ƀĭng ngă lŏ hma thâo săng, hluê ngă, rơ̆ng dŭm mta klei kčah mtrŭn./.