Đại tá Trần Văn Quyển, Khua Lữ đoàn 146 brei thâo: Hruê 8/5/1978 jing gru kruăk hƀuê ênuk yuôm bhăn: Mkŏ mjing êpul kahan kdơ̆ng mblah, răng mgang plao ksĭ, pral bi hơĭt ủuă mkŏ mjing, msir mghaih klei kƀah tal êlaoa, ƀrư̆ ƀrư̆ mkŏ mjing knhuah klei bhiăn mă bruă, mkŏ mjing hdră mjuăt bi hriăm, mkŏ mkra hdră kdơ̆ng mblah răng mgang plao ksĭ. Găn 48 thŭn, Lữ đoàn 146 jing leh êpul phŭn hlăm hdră kriê dlăng, răng mgang plao ksĭ Trường Sa. Knŏng tĭng hlăm 10 thŭn êgao, êpul hmao ƀuh 5 êbâo gưl mta kñăm ti ưăl adiê, ti êa ksĭ; pral đru kčĕ, msir mghaih tŭ dưn klei mâo, amâo lui kdjăt kƀla, hluê ngă giăm 150 gưl tui duah, đru dŏng, dŏng mtlaih, mdrao mgŭn giăm 1.500 čô mnuih hiu mă kan, ktŭng giăm 60 boh hô̆ mran mâo klei truh ti anôk êđăp ênang.

Hluê si Đại tá Trần Văn Quyển, ară anei, anăp klei čiăng răng mgang klei dưi kiă kriê kluôm ênŭm krĭng plao ksĭ hlăm boh klei mrâo, Lữ đoàn 146 amâo mdei mđĭ hnơ̆ng tŭ hdră mjuăt bi hriăm, mprăp ai kdơ̆ng mblah, mkŏ mjing êpul kahan Lữ đoàn kjăp ktang kluôm dhuôm.

Lữ đoàn mđing hluê ngă kjăp hdră mjuăt bi hriăm “phŭn, klă sĭt, hơĭt”, mkŏ mjing hdră mjuăt bi hriăm djŏ hŏng bruă klam, djŏ hŏng hdră kdơ̆ng mblah, djŏ hŏng boh sĭt ti krĭng ksĭ. Mbĭt anăn, krơ̆ng kjăp êpul kahan, kdrăp mnơ̆ng dôk mprăp kdơ̆ng mblah, mđĭ hdră msir mghaih klei mâo, amâo lui kdjăt kƀla hlăm djăp mta ra klei.

Amâo djŏ knŏng mđing mđĭ hnơ̆ng tŭ jăk hdră mtô bi hriăm, mprăp ai kdơ̆ng mblah, Lữ đoàn 146 lŏ mđing bi kjăp knhuah kđi čar, klei gĭr kơ phung kahan ti krĭng plao ksĭ. Hlăm wăl anôk bŏ hŏng angĭn, mđiă, kbưi hŏng lăn hang, tlă anăp hŏng lu klei dleh dlan, lông dlăng, hdră mjuăt bi hriăm bruă kđi čar, klei mĭn mâo nanao bruă Đảbg, knơ̆ng gĭt gai lĭng kahan dŭm gưl pŏk ngă tŭ dưn, đru kơ phung knuă druh, lĭng kahan hơĭt kjăp ti krĭng êa poh yă. Đại tá Phạm Văn Thọ, Khua hlăm bruă Đảng Lữ đoàn 146, Kahan êa krĭng 4 mñă klă:

 Hmei pŏk ngă leh mđrăm mbĭt dŭm hdră msir, hlăm anăn mđing kơ bruă mjuăt bi hriăm knhuah gru kñăm krŭ wĭt ai tiê kơ grăp čô knuă druh, lĭng kahan thiăm ai đăo knang, klei ktưn hưn kơ knhuah gru mơ̆ng Êpul Trường Sa Jhŏng ktang. Mơ̆ng anăn mkŏ mjing kơ phung knuă druh, lĭng kahan klei thâo kjăp kơ bruă kđi čar, kjăp klei mĭn gĭr kdơ̆ng mblah, mđĭ lar knhuah gru Lĭng kahan Awa Hô – lĭng kahan êa jhŏng ktang, mprăp ai kdơ̆ng mblah, săn asei răng mgang kjăp klei dưi kiă kriê kluôm krĭng lăn êa ksĭ, plao ksĭ, krĭng lăn yuôm bhăn mơ̆ng Ala čar hlăm djăp klei mâo.

Mđĭ lar knhuah gru êpul êya dua blư̆ dưi mđup brei Anăn knăl Êpul kahan djă phao ktuang yang ƀuôn Jhŏng ktang, hruê anei, ti dŭm plao ksĭ hlăm Trường Sa, knuă druh, lĭng kahan Lữ đoàn 146 ăt hruê mlan kjăp kngan djă phao ktuang, răng mgang kjăp klei dưi kiă kriê krĭng lăn plao ksĭ yuôm bhăn mơ̆ng Ala čar. Khădah klei găl mă bruă dleh dlan, ƀiădah grăp čô kahan Trường Sa bi mklă nanao klei đua klam, dlăng plao ksĭ jing sang, êa ksĭ jing ƀuôn sang. Trung tá Trần Huy Phụng, Khua bruă Đảng hlăm plao ksĭ Trường Sa mñă:

 Knuă druh, lĭng kahan ti plao ksĭ kjăp klei mĭn bruă kđi čar. Hlăm ya boh klei, khădah săn asei dưn jih jang ăt gĭr răng mgang kjăp klei dưi kiă kriê êa ksĭ plao ksĭ yuôm bhăn mơ̆ng Ala čar”.

Ktưn hưn lŏ čuê knhuah gru aê ama nao êlâo, ênuk gưl knuă druh, lĭng kahan mda asei mơ̆ng Lữ đoàn 146 hruê anei dôk gĭr mjuăt bi hriăm, duh myơr, đru mkŏ mkra êpul kjăp ktang kluôm dhuôm, jing gru mngač êdah êdi. Trung tá Nguyễn Thành Vũ, knuă druh mda asei Lữ đoàn 146, kahan êa krĭng 4 brei thâo: Dưi mă bruă hlăm êpul êya dua blư̆ pah mni jing Êpul kahan djă phao ktuang ala ƀuôn jhŏng ktang jing klei ktưn hưn prŏng hŏng grăp čô knuă druh, lĭng kahan Trường Sa:

Kâo ktưn hưn jing lĭng kahan mda asei Êpul kahan Trường Sa jhŏng ktang. Kâo srăng gĭr hgao jih klei dleh dlan răng mgang kjăp krĭng lăn, plao ksĭ, êa ksĭ yuôm bhăn Ala čar”.

Giăm êma pluh thŭn, mơ̆ng hruê tal êlâo bŏ hŏng klei dleh dlan, anôk bruă nah gŭ kƀah êwư, phung knuă druh, Lĭng kahan Lữ đoàn mdĭ lar ai tiê čŏng pô, hŏng klei ƀuăn “Khădah săn asei dưn ƀiădah kut kat amâo đuê̆ mơ̆ng plao ksĭ, luič tŭ mơh asei mlei ƀiădah amâo dưi luič klei dưi kiă kriê”. Găn hgao lu klei dleh dlan ti krĭng ksĭ, plao ksĭ Trường Sa hruê anei, phung kahan êa ăt jih hruê mlam dôk krơ̆ng kjăp wăl adiê Ala čar hŏng klei jhŏng, klei kjăp, ai tiê đua klam lehanăn klei čang hmăng duh myơr amâo mdei. Mơ̆ng krĭng lăn anei, knhuah gru jhŏng ktang mơ̆ng Êpul kahan Trường Sa dưi čuê čih hŏng dŭm hdră kdơ̆ng mblah mrâo hlăm klei răng mgang kluôm ênŭm krĭng êa ksĭ, plao ksĭ yuôm bhăn mơ̆ng Ala čar./.