Hluê si klei hưn, wưng êgao êpul kahan ksiêm gĭr kriê dlăng jăk, mđĭ hnơ̆ng tŭ jăk bruă krư̆ kđăl, hluê ngă klei bi kmhal mnă; rơ̆ng klei êđăp ênang, hơĭt kjăp ti 54 sang mnă hŏng 178 anôk mbha sang mnă.Mbĭt anăn, dŭm êpul lŏ ngă jăk hdră đru kčĕ, hluê ngă hdră phưi mnă, phưi krư̆ êlâo kơ wưng kčah mâo klei găl. Hlăm 2 thŭn êgao hŏng êbeh 32.000 čô mnă ƀiădah ênoh mnuih lŏ wĭt ngă soh ƀiă snăk (0.06%), bi êdah klei khăp čiăng, klei jăk mơ̆ng hdră êlan yang ƀuôn drei, mbĭt anăn bi êdah klă boh tŭ dưn hlăm bruă mjuăt bi hriăm mnuih mnă.

Bi mni kơ dŭm boh tŭ êdah êdi mơ̆ng êpul kahan ksiêm, kiă kriê sang mnă mâo leh hlăm wưng êgao; Ƀiădah Khua gĭt gai Đảng, Khua Lăn čar Tô Lâm ăt lač, brei drei ăt ksiêm dlăng kjăp bruă kiă kriê, krư̆ kđăl, lŏ wĭt ñŭ kma êpul êya ăt dôk mâo dŭm mta ka hmao hŏng klei čiăng mơ̆ng boh sĭt. Khua gĭt gai Đảng, Khua lăn čar Tô Lâm mtă, mđing hluê ngă 6 hdră êlan prŏng, hlăm anăn, brei mlih mrâo klei mĭn kơ klei ngă soh jhat leh anăn bruă kriê dlăng mtô mjuăt bi hriăm, bi mlih ktang mơ̆ng klei mĭn kiă kriê phung mnă jing hdră mtô mjuăt anak mnuih. Ñu ăt mñă brei bi mguôp klei phat mkra hŏng gang mkhư̆, hmao ƀuh, bi kdơ̆ng hŏng phung ngă soh leh anăn mkŏ mjing yang ƀuôn êđăp ênang mơ̆ng mphŭn.