Hlăm 6 mlan akŏ thŭn, Êpul gơ̆ng bruă ƀuôn sang dŭm gưl čar Dak Lak hluê ngă leh lu bruă klam yuôm bhăn hlăm wưng mrâo bi mlih wưng păn bruă, mkŏ dăp mnuih mă bruă hluê gru hmô bruă Knŭk kna dua gưl. Êpul gơ̆ng bruă ƀuôn sang gưl čar mkŏ mjing leh 4 gưl kƀĭn, ba mdah 46 hdră mtrŭn, klei ksiêm êmuh lŏ dơ̆ng dưi bi mlih mrâo, kñăm kơ dŭm boh klei phung bi ala kơ mnuih ƀuôn sang uêñ mĭn. Bruă bi tuôm hŏng phung bi ala dưi rơ̆ng jêñ jêñ, tŭ mă êbeh 788 klei blŭ mguôp, klei akâo mơĭt kơ anôk bruă mâo klei dưi ksiêm dlăng, mgaih msir.

Ti gưl să, Êpul gơ̆ng bruă ƀuôn sang dŭm alŭ wăl mkŏ mjing leh êbeh 400 gưl kƀĭn, bi klă êbeh 2000 hdră mtrŭn, ngă giăm 230 klei ksiêm dlăng thơ̆ng kơ bruă leh anăn 58 klei ksiêm dlăng, đru ruh mgaih lu klei dleh dlan bluh mâo ti nah gŭ. Hlăm klei kƀĭn trông, phung bi ala akâo brei mđĭ hĭn bruă bi hriăm êlam, bi kluôm klei bi mguôp plah wah Êpul gơ̆ng bruă ƀuôn sang leh anăn Bruă sang čư̆ êa hŏng dŭm anôk bruă thơ̆ng kơ bruă, mbĭt anăn mtrŭt mđĭ ba yua klei hưn mthâo mrâo mrang čiăng mđĭ hĭn boh tŭ dưn mơ̆ng anôk bruă.