Mđup brei hnư mnơ̆ng kơ phung kahan êka êkeh, kahan ruă duam, Khua knŭk kna Lê Minh Hưng bi êdah klei mgei ai tiê leh anăn mơĭt klei hơêč hmưi, hdơr knga êlam hĭn kơ jih jang phung kahan djiê êngiă, mnuih mâo bruă tŭ dưn hŏng cách mạng hlăm kluôm ala. Khua knŭk kna mñă klă, jiă kma klei bhiăn "mnăm êa hdơr kơ hnoh" leh anăn klei mtă mơ̆ng khua gĭt gai Hồ Chí Minh, hlăm 79 thŭn êgao, Đảng leh anăn knŭkkna mâo nanao klei uêñ mĭn, ngă jăk bruă hdơr knga tla ai.

Dŭm hdră mtrŭn jăk găl ƀrư̆ hruê ƀrư̆ kluôm ênŭm, phung dưi dưn pŏk mlar. Klei mtrŭt mjhar "Jih jang mnuih ƀuôn sang dlăng kriê dŭm gŏ sang kahan êka êkeh, djiê êngiă leh anăn phung mâo bruă tŭ dưn hŏng cách mạng" dưi bi lar ktang, mâo klei hrăm mbĭt sa ai mơ̆ng yang ƀuôn. Dŭm klei khăp leh anăn bruă klam anăn bi mguôp jing klei jăk siam bŏ hŏng klei thâo khăp, lŏ čuê knhuah gru khăp čiăng mơ̆ng djuê ana. Khua knŭk kna bi mklă: Ai tiê jhŏng ktang lehanăn klei săn asei mlei mơ̆ng phung kahan êka êkeh, kahan ruă duam anăn yơh jing klei bi êdah mơ̆ng hdră êlan krŭ kdơ̆ng, jing anôk jưh knang kơ ai tiê kjăp bi kjăp klei đăo knang kơ jih bruă kđi čar hlăm hdră bi mlih mrâo Lăn čar.