Ti anôk bi tuôm, Khua bruă kƀĭn ala Trần Thanh Mẫn mñă klă Việt Nam dlăng yuôm klei mjĕ giăm hƀuê ênuk leh anăn bi hgŭm lu mta bruă plah wah dua ala čar, dlăng Panama jing ƀĭng hgŭm phŭn ti krĭng Mi Latinh. Khua bruă kƀĭn ala mñă klă, Bruă kƀĭn ala Việt Nam sa ai hŏng dŭm hdră êlan, hdră msir mđĭ hĭn klei bi mjĕ dua ala čar dưi bi tŭ ư, dŭm klei kuôl kă dưi siñê ƀri gưl hriê čhưn mơ̆ng Khua mil čhil, ƀuăn rơ̆ng hrăm mbĭt leh anăn mkŏ mjing hdră bhiăn găl ênưih čiăng pŏk ngă dŭm klei kuôl kă dua tĭng, bi sĭt klei găl bi hgŭm dôk prŏng êdi plah wah dua ala čar.

Kơ klei bi hgŭm plah wah anôk bruă kƀĭn ala dua ala čar, Khua mil čhil Panama tŭ ư sa ai hŏng bruă mtrŭt mđĭ klei bi trông êpul plah wah Anôk bruă kƀĭn ala Panama hŏng Anôk bruă kƀĭn ala Việt Nam, bi trông klei thâo mkŏ mjing hdră bhiăn leh anăn klei ngă bruă plah wah dŭm Anôk bruă, anôk bruă kƀĭn ala dua ala čar; mđĭ lar hĭn bruă klam mơ̆ng anôk bruă kƀĭn ala hlăm bruă mkŏ mjing hdră bhiăn găl ênưih kơ klei bi hgŭm dua nah, sa ai hŏng bruă mkŏ dŭm anôk bruă Knŭk kna - alŭ wăl - anôk bruă duh mkra leh anăn đru ruh mgaih dŭm klei gun kpăk, mtrŭt mđĭ dŭm klei găl bi hgŭm klă klơ̆ng.