Gưl Khua knŭk kna Lê Minh Hưng nao čhưn klă sĭt Cộng hòa Dân chủ Nhân dân Lào  amâo djŏ knŏng jing bruă hŏng tač êngao ôh, ƀiădah lŏ jing klei hưn mthâo ktang kơ klei mĭn, klei jhŏng leh anăn klei mđing mrô sa hlăm hdră êlan hŏng tač êngao mơ̆ng Việt Nam hlăm wưng đĭ kyar mrâo. Gưl nao čhưn jing klei găl čiăng kơ khua gĭt gai dua ala čar kah mbha klei mĭn leh anăn hdră êlan êlâo kơ dŭm boh klei hlăm alŭ wăl leh anăn tar rŏng lăn bi mđing.

Klei sa ai leh anăn bi hgŭm plah wah Việt Nam leh anăn Lào ti dŭm anôk bi kƀĭn lu tĭng msĕ si ASEAN, Êpul hgŭm lu ala čar leh anăn dŭm hdră bi hgŭm krĭng Lăn dap kngư mâo bruă klam yuôm bhăn hlăm bruă krơ̆ng kjăp ai tiê bi hgŭm hlăm êpul, rơ̆ng klei blŭ sa anăn leh anăn krơ̆ng kjăp wăl anôk êđăp ênang, hơĭt kjăp mơ̆ng kluôm krĭng wăl. Gưl  Khua knŭk kna Lê Minh Hưng  nao čhưn ti Lào jing leh knhuang nao pral čiăng bi mlih dŭm klei ƀuăn rơ̆ng jing boh tŭ dưn klă klơ̆ng, pŏk dŭm klei găl mrâo kơ klei bi hgŭm klă sĭt, tŭ dưn leh anăn hơĭt kjăp plah wah dua ala čar, dua djuê ana.