Hdră bi mjĕ mjuk pô tuôm găn  ƀuê ênuk mâo dua kdrêč “Hnơ̆ng phŭn Klei săn asei” leh anăn “Čih lŏ čuê klei mmuñ jhŏng ktang”. Hdră lŏ bi êdah wĭt ai êwa mơ̆ng ƀuôn prŏng phŭn mơ̆ng dŭm hruê Kluôm ala kdơ̆ng mblah ktang phĭt thŭn 1946, lĭng kahan leh anăn mnuih ƀuôn sang Hà Nội gĭr ktưn kdơ̆ng mblah jih 60 hruê mlam ngă bi toh hroh klei mĭn mơ̆ng phung roh Prăng, răng mgang klei êđăp ênang kơ anôk bruă mơ̆ng Đảng, Knŭk kna kbiă nao kơ kdrăn mblah, mjing klei găl kơ jih djuê ana mŭt hlăm klei kdơ̆ng mblah sui thŭn. Čih dŭm kdrêč h ƀuê ênuk jhŏng ktang anăn, jing phung ƀuôn sang Hà Nội, phung lĭng kahan “Săn asei čiăng kơ lăn čar hdĭp”.

Nao hgŭm hlăm hdră kdơ̆ng mblah mơ̆ng hlăk dôk jing sa čô hđeh, kahan hđăp Phạm Đình Luận, khua kahan Trung đoàn Ƀuôn prŏng phŭn, lŏ hdơr:

“Hlăk anăn snăn kâo dôk ti ƀuôn prŏng Hàng Bông. Prăng jing ñu bi rai ngă lu snăk klei jŭ jhat. Tơdah jih lăn čar bi kdơ̆ng hluê hŏng asăp Awa iêu mthưr, jih jang mnuih ƀuôn sang hŏng lĭng kahan, phung mduôn phung hđeh êkei mniê nao hgŭm hlăm klei bi blah ti Hà Nội… Hlăk anăn kâo mrâo 9 thŭn đuič, lehanăn hlăm Trung đoàn ƀuôn prŏng phŭn amâo mâo djŏ knŏng hjăn kâo jing hđeh ôh, ƀiădah lŏ mâo lu snăk phung bi ala ti dŭm anôk bruă mkăn.”

Hlăm hdră bi mjĕ mjuk, hdră hưn mdah dưi rang mdah hŏng dŭm klei yăl dliê klă sĭt mơ̆ng phung bi ala, phung knuă druh, lĭng kahan Knơ̆ng gĭt gai lĭng kahan ƀuôn prŏng phŭn lŏ bi êdah dŭm wăl anôk gang mkhư̆ klei pui ƀơ̆ng ti dlông adiê ti Hà Nội hlăm 12 hruê mlam ngă tŭ jing "Hdră mblah Điện Biên Phủ ti dlông adiê" thŭn 1972. Lŏ dơ̆ng jing rup dŭm knhuang jhŏng ktang ti krah ênuk êđăp ênang mơ̆ng phung knuă druh lĭng kahan hlăm hdră gang mkhư̆ klei yan adiê ngă, đru dŏng, răng mgang klei êđăp ênang kơ grăp krĭng ƀuôn sang, êlan klông.

Mơ̆ng anăn dưi bi lar klei ktưn hưn, lŏ krŭ wĭt klei čang hmăng duh myơr mơ̆ng ênuk ară anei lŏ čuê knhuah gru "Djiê êngiă čiăng kơ lăn čar hdĭp", lŏ čuê klei mmuñ jhŏng ktang hŏng bruă klă sĭt, hrăm mbĭt đru mguôp răng mgang klei êđăp ênang, mkŏ mjing ƀuôn prŏng phŭn Hà Nội kreh dhar, mrâo mrang. Nao hlăm hdră bi mjĕ mjuk, phung êdam êra Nguyễn Viết Thịnh, ƀuôn hgŭm Ô Chợ Dừa, lač:

“Ênuk gưl krŭ kdơ̆ng thŭn dih yua leh asei mlei pô čiăng răng mgang grăp boh ƀuôn, grăp boh sang. Snăn yơh ênuk gưl hđeh hmei hruê anei čŏng yua ai ktang, klei jhŏng leh anăn klei thâo mĭn pô čiăng kriê pioh leh anăn răng mgang ƀuôn prŏng phŭn Hà Nội ƀrư̆ hruê ƀrư̆ mdrŏng sah, kreh dhar leh anăn êđăp ênang./.”