Blŭ hrăm mjưh ruê̆ klei bi kƀĭn, Khua gĭt gai Đảng, Khua lăn čar Tô Lâm mñă klă, lŏ dơ̆ng hluê ngă dŭm hdră mtrŭn mơ̆ng akŏ wưng păn bruă, Klei bi kƀĭn tal anei bi klă Hdră mtrŭn Klei bi kƀĭn tal XIV mơ̆ng Đảng, bi mguôp mkŏ mjing Đảng hŏng kriê dlăng ala čar leh anăn mđĭ kyar lăn čar. Gưl dlông bi tŭ ư hdră ksiêm duah dŭm boh klei phŭn mơ̆ng Đảng leh anăn hdră êlan đĭ kyar sui thŭn mơ̆ng lăn čar.

Khua gĭt gai Đảng, Khua lăn čar brei thâo, Gưl dlông bi mklă leh dŭm hdră êlan mrâo kơ klei mđĭ hĭn ai dưi čŏng pô mlih mrâo, čŏng pô ƀư̆ mkra mơ̆ng Đảng lehanăn bruă kđi čar. Gưl dlông bi mklă leh Hdră mtrŭn kơ bruă mđĭ hĭn klei mkŏ mjing, ƀư̆ mkra Đảng lehanăn bruă kđi čar doh mngač, kjăp ktang, kluôm dhuôm, djŏ hŏng klei čiăng mđĭ kyar mơ̆ng lăn čar hlăm ênuk gưl mrâo. Gưl dlông bi mklă leh klei mlih mrâo bruă knuă druh lehanăn hdră êlan iêo jak, ba yua mnuih mâo klei thâo, mprăp êpul mă bruă djŏ hŏng klei čiăng mđĭ kyar lăn čar. Leh Klei bi kƀĭn, Khua gĭt gai Đảng, Khua lăn čar Tô Lâm mtă brei bi mklă djăp ênŭm, hmao dŭm hdră mtrŭn, bi leh kdlưn hĭn bruă klam thŭn 2026, mjing tur knơ̆ng čiăng kơ thŭn 2027 mtrŭt mđĭ, kpưn đĭ; mđĭ ktang ksiêm dlăng, ktuê dlăng bruă hluê ngă leh anăn mđĭ lar bruă klam mơ̆ng mnuih ƀuôn sang.