Leh Knăm tŭ drông klă sĭt, Khua knŭk kna Lê Minh Hưng leh anăn Khua knŭk kna Saleumxay Kommasith mkŏ mjing klei bi trông. Dua Khua knŭk kna hưn mthâo kơ hdơ̆ng pô kơ boh klei grăp ala čar, hdră êlan, mta kñăm mđĭ kyar hlăm wưng kơ anăp leh anăn dŭm mta phŭn pŏk ngă hdră mtrŭn Klei bi kƀĭn bruă Đảng mơ̆ng grăp ala čar. Dua Khua knŭk kna bi êdah klei mơak ti anăp dŭm knhuang đĭ kyar jăk leh anăn kluôm ênŭm mơ̆ng klei bi mjĕ dua nah wưng êgao; lŏ dơ̆ng bi mklă klei bi mjĕ yuôm bhăn Việt Nam - Lào jing klei mđing mrô sa hlăm hdră êlan hŏng tač êngao mơ̆ng grăp ala čar. Kơ bruă duh mkra, dua tĭng bi klă klei bi hgŭm duh bi liê lŏ dơ̆ng jing gru mngač hlăm klei bi mjĕ dua nah. Việt Nam ară anei mâo hlăm brô 300 hdră duh bi liê ti Lào hŏng ênoh bi klă 7 êklai USD. Dua tĭng bi tŭ ư lŏ dơ̆ng gĭr mjing boh kdrŭt, mđĭ klei bi đru leh anăn bi hgŭm plah wah dua bruă duh mkra; bi hgŭm mkŏ mjing hdră êlan leh anăn dŭm mta phŭn yuôm bhăn čiăng ba hnơ̆ng bruă mnia blei dua nah truh 5 êklai USD. Ƀri wưng anei, Khua knŭk kna Lê Minh Hưng hưn mthâo Việt Nam srăng rŭ mdơ̆ng kơ mnuih ƀuôn sang Lao dua boh sang hră, hŏng ênoh 2 êklăk USD.

Leh klei blŭ hrăm, dua čô Khua knŭk kna ktuê dlăng leh Knăm jao 11 hră mơar bi hgŭm hlăm dŭm mta bruă răng mgang klei êđăp ênang, bruă hdră bhiăn, bruă ngăn prăk, bruă pui kmlă, bruă sang hră mơar, djuê ana, klei đăo leh anăn bi hgŭm plah wah dŭm alŭ wăl dua ala čar; nao hlăm Knăm mphŭn pŏk hdră bruă Sang hră gưl prŏng bi hgŭm Lào - Việt./.