Klah čŭn 67 mơ̆ng Phŭn bruă kđi čar, Hdră mtrŭn 72/2022/QH15 mơ̆ng Bruă kƀĭn ala bi êdah klei mđing dlăng mơ̆ng Gưl dlông, mjing tur knơ̆ng hdră êlan leh anăn ai dưi čiăng mkŏ mkra Ƀuôn Ama Thuôt jing ƀuôn prŏng phŭn krĭng Lăn Dap Kngư.

Dŭm hdră mtrŭn anei mjing leh tur knơ̆ng kđi čar, hdră bhiăn yuôm bhăn čiăng kơ Dak Lak mđing dlăng klei găl duh bi liê, mđĭ kyar Ƀuôn Ama Thuôt. Năng mđing, Hdră mtrŭn 72 čoh čuăn 5 êpul hdră mtrŭn mdê hjăn kơ ngăn prăk, hdră duh bi liê, hdră čuăl mkă, iêo jak klei duh bi liê leh anăn mnuih mă bruă hnơ̆ng tŭ jăk. Hlăm anăn, hdră mtrŭn thiăm mbŏ 45% hnơ̆ng tĭng tla nanao dưi mđĭ lar boh tŭ klă sĭt.

Wưng thŭn 2021–2025, ênoh prăk duh bi liê mđĭ kyar kluôm yang ƀuôn ti alŭ wăl Ƀuôn Ama Thuôt mâo êbeh 125.000 êklai prăk. Anôk bruă nah gŭ, êlan klông, bruă mdrao mgŭn, mtô bi hriăm dưi mđing dlăng; dŭm wăl, anôk bruă tuh tia mkra mjing iêo jak thiăm lu hdră bruă, đru bi kjăp bruă klam jing anôk phŭn mơ̆ng ƀuôn prŏng.

Khădah snăn, Cao Đình Huy, Khua knơ̆ng bruă ngăn prăk čar Dak Lak lač, klei đĭ kyar ka bi knar hŏng klei găl mâo. Hlăm 10 hnơ̆ng čuăn phŭn, mâo 5 hnơ̆ng čuăn ka djăp. Bruă duh mkra ƀuôn prŏng ka mâo bruă ba anăp, ka dưi iêo jak phung duh bi liê hdră bruă leh anăn hdră bruă hnơ̆ng prŏng. Bruă tuh tia mkra mjing êlam, logistics, hiu čhưn ênguê hnơ̆ng tŭ jăk leh anăn bi hgŭm krĭng dôk kƀah.

“Mâo 3 hdră ka mâo boh tŭ dưn sĭt. Tal êlâo jing hdră mđĭ ênoh prăk brei čan ka mâo ôh ênoh prăk brei čan, tal dua klei đru kơ prăk jia hrui wĭt mơ̆ng anôk bruă duh mkra ka mâo ôh hdră bruă djăp klei găl leh anăn tal tlâo hdră iêo jak phung thơ̆ng kơ bruă, phung kreh knhâo ka dưi iêo jak ôh.”

Mơ̆ng tur knơ̆ng ksiêm wĭt Klei klah čŭn 67 leh anăn Hdră mtrŭn 72, Dak Lak akâo kơ Gưl dlông lŏ dơ̆ng čuê, mkra mlih dŭm klei bhiăn dưi mđĭ lar boh tŭ dưn; ksiêm dlăng thiăm mbŏ hdră êlan kơ anôk bruă nah gŭ, bi mlih mtah, kreh knhâo mrâo mrang, logistics leh anăn bi hgŭm krĭng. Dak Lak ăt ba mdah pŏk mlar klei bhiăn thiăm mbŏ 45% hnơ̆ng tĭng tla nanao, djŏ guôp hŏng wăl đĭ kyar mrâo, mguôp hŏng dŭm anôk phŭn mđĭ kyar Ƀuôn Ama Thuôt - Ƀuôn Hồ leh anăn Tuy Hòa - Đông Hòa.

Lương Nguyễn Minh Triết, Khua bruă Đảng čar Dak Lak bi mklă, dŭm klei bhiăn mdê hjăn mơ̆ng Gưl dlông brei kơ Ƀuôn Ama Thuôt jing klei găl leh anăn bruă klam prŏng mơ̆ng alŭ wăl. Hlăm boh klei čar Dak Lak mrâo mâo wăl đĭ kyar prŏng hĭn, bruă lŏ čuê dŭm hdră êlan anei brei mguôp hŏng hdră čuăl mkă kluôm ƀuôn prŏng Ƀuôn Ama Thuôt truh thŭn 2050, mđĭ ktang bi hgŭm leh anăn mđĭ lar bruă klam phŭn mơ̆ng ƀuôn prŏng hŏng kluôm krĭng.

“Hdră mtrŭn mâo leh, hdră čuăl mkă mâo bi mklă leh, dŭm bruă klam phŭn ăt mâo bi mklă leh mơh, klei yuôm bhăn hĭn ăt jing bruă mkŏ mjing hluê ngă. Ya bruă dưi ngă leh snăn ăt brei ksiêm dlăng phŭn agha, ya ngă dưi; ya bruă ka dưi ngă ăt brei ksiêm dlăng bi nik, ya ngă ka dưi, mơ̆ng kbiă hriê klei anăn.”

Nguyễn Đức Trung, K'iăng Khua Anôk bruă hdră êlan leh anăn Hdră kčah Gưl dlông mñă klă hdră êlan mdê hjăn knŏng klă sĭt mđĭ lar boh tŭ dưn tơdah nao mbĭt hŏng klei thâo mkŏ mjing hluê ngă leh anăn klei dưi iêo mthưr, ba yua tŭ dưn ai dưi. Gưl dlông čih yap, sa ai hŏng dŭm klei akâo mơ̆ng čar, ƀiădah mtă brei ruah hdră êlan mâo mta phŭn, msir mgaih djŏ anôk kpăk, mâo klei čih yap klei hmăi leh anăn klei dưi ngă.

"Hdră mtrŭn knŭk kna knŏng dưi mđĭ lar boh tŭ dưn tơdah dưi mkŏ mjing djŏ hŏng klei čiăng hlăm boh sĭt leh anăn nao mbĭt hŏng klei dưi mkŏ mjing hluê ngă leh anăn klei dưi ba yua tŭ dưn dŭm ai dưi. Hdră mtrŭn knŭk kna knŏng jing klei čiăng, ƀiădah bruă mkŏ mjing hluê ngă kơh jing mta phŭn bi klă."

Bruă lŏ dơ̆ng bi leh dŭm klei bhiăn mdê hjăn čiăng mđĭ kyar Ƀuôn Ama Thuôt amâo djŏ knŏng kñăm ruh mgaih dŭm klei dleh dlan ti anăp, ƀiădah lŏ mjing boh kdrŭt čiăng kơ ƀuôn prŏng mđĭ lar bruă klam jing anôk phŭn, boh kdrŭt mkŏ leh anăn atăt gai mđĭ kyar bruă duh mkra - ala ƀuôn mơ̆ng čar Dak Lak mrâo leh anăn wăt krĭng Lăn Dap Kngư. Khădah snăn, mơ̆ng hdră êlan truh kơ boh sĭt ăt čiăng sa klei gĭr ktưn ktang, klei čŏng pô leh anăn ktang phĭt hlăm hdră hluê ngă. Anei srăng jing mta phŭn čiăng bi mlih dŭm klei găl kơ klei bhiăn, ai dưi jing dŭm klei bi mlih klă sĭt, ba Ƀuôn Ama Thuôt đĭ kyar năng hŏng bruă klam jing ƀuôn prŏng phŭn krĭng.