Hdră mtrŭn anei mâo hưn mdah leh lu phung amĭ ama leh anăn hđeh sang hră bi êdah klei rŭng răng kyua phung hđeh mâo puăng lu ƀiădah ăt kăn dưi mŭt hriăm klei čiăng 2. Hlue si hdră mtrŭn, Knơ̆ng bruă sang hră mtô bi hriăm čar Dak Lak mbŏ leh 282 čô hlue si klei čiăng 1 kơ 4 sang hră mâo Sang hră gưl tlâo Nguyễn Huệ, Sang hră gưl tlâo  Lê Quý Đôn, Sang hră gưl tlâo Ƀuôn Ama Thuôt leh anăn Sang hră gưl tlâo  Čư̆ M'Gar; mbĭt anăn mbŏ 302 čô hriăm klei čiăng 2 ti dŭm sang hră gưl 3 Hồng Đức, Chu Văn An, Nguyễn Trãi leh anăn Lê Hữu Trác kơ phung hđeh sang hră djăp klei găl hlue si hdră kčah, hŏng hnơ̆ng puăng djŏ ruah klă klơ̆ng kơ grăp čô.

Lê Thị Thanh Xuân, Khua Knơ̆ng bruă sang hră mtô bi hriăm čar Dak Lak brei thâo bruă hrŏng ruah hđeh hriăm adŭ 10 dôk dưi pŏk ngă djŏ hdră. Leh hưn mdah puăng hnơ̆ng čuăn, phung hđeh mâo 3 hruê ngă hră mơar mŭt hriăm. Leh hruê 3/7, Knơ̆ng bruă sang hră mtô bi hriăm čar Dak Lak srăng lŏ dơ̆ng ksiêm dlăng boh klei čiăng mâo klei gĭt gai djŏ guôp.