Hlue si klei hưn mdah, 6  mlan akŏ thŭn, čar Dak Lak ksiêm dlăng leh anăn pŏk ngă kjăp dŭm hdră êlan mơ̆ng Đảng, hdră êlan, hdră bhiăn Knŭk kna kơ bruă lĭng kahan, răng mgang ala čar, bruă răng mgang knông lăn; hmao  hlue ngă jing hdră êlan, hdră kčah djŏ guôp hŏng boh sĭt alŭ wăl.

 Hlue si Đại tá Lê Văn Hùng,  K’iăng Khua gĭt gai, Khua đru kčĕ, Anôk bruă gĭt gai lĭng kahan čar Dak Lak, alŭ wăl bi mguôp leh kjăp hŏng bruă mđĭ kyar bruă duh mkra- ala ƀuôn hŏng klei mkra mđĭ bruă răng mgang klei êđăp ênang. Dŭm anôk bruă djŏ tuôm bi hgŭm leh hlăm klei bi mklă dŭm hdră čuăl mkă, hdră bruă čiăng ngă djŏ klei čiăng mđĭ  kyar, rơ̆ng êđăp ênang lĭng kahan. Alŭ wăl ăt hlue ngă boh tŭ dŭm hdră msir bi kdơ̆ng trah mă kan hdang soh hŏng hdră bhiăn (IUU), kriê dlăng kjăp mnuih mă bruă, kŭm păn srăng ba nao hgŭm răng mgang klei dưi êa ksĭ, plao ksĭ; mđĭ klei kriê dlăng, răng mgang klei dưi knông lăn, bi hgŭm ngă tŭ dưn bruă mbha knông lăn, gơ̆ng knông lăn  hŏng ala čar Campuchia.

Êpul kahan ƀuôn leh anăn mkăp lŏ dơ̆ng dưi mđĭ. Bruă ruah kahan dưi hlue ngă kjăp, klă mngač, bi leh 100% hnơ̆ng kčah hŏng giăm 5.500 čô mnuih ƀuôn sang mŭt kahan. Dŭm êpul lĭng kahan, kahan ksiêm leh anăn răng mgang knông lăn mđĭ lar bi hgŭm kjăp hlăm bruă rơ̆ng êđăp ênang kđi čar, êđăp ênang ala ƀuôn, răng mgang klei kđi čar yuôm bhăn, mbĭt anăn mđĭ lar bruă klam phŭn hlăm klei gang mkhư̆ yan adiê ngă, tui duah klei đru dŏng. Đại tá Lê Văn Hùng  brei thâo, dŭm anôk bruă lĭng kahan čar Dak Lak mkŏ mjing leh djăp hdră kčah, hdră msir ngă bruă, mprăp bi blah:

“ Dŭm anôk bruă, êpul bruă čar mkŏ mjing djăp ênŭm hdră kčah, hdră msir bruă klam leh anăn mkŏ mjing klei ngă bruă tơdah ngă bruă sang čư̆ êa alŭ wăl dua gưl, khăng mkŏ mjing mtô bi hriăm, hlue ngă kjăp hdră msir, hymao msir mgaih, tŭ dưn klei mâo. Pŏk ngă hdră kčah bi blah “wăl adiê hơĭt kjăp”kñăm mkŏ mjingklei gang mkhư̆ wăl adiê bi kjăp, lu tal, grăp knhuang bi leh hdră mă bruă gang mkhư̆ kdrăp mnơ̆ng phiơr amâo mâo pô mgăt.”

Đào Mỹ,  K’iăng Khua Knơ̆ng bruă sang čư̆ êa čar Dak Lak brei thâo, 6 mlan knhal jih thŭn 2026, bruă klam lĭng kahan, răng mgang klei êđăp ênang alŭ wăl leh anăn bruă răng mgang knông lăn adôk lu boh phŭn. Đào Mỹ mtă kơ dŭm anôk bruă, êpul lĭng kahan lŏ dơ̆ng ksiêm dlăng, pŏk ngă tŭ dưn hdră êlan mơ̆ng Đảng, hdră êlan, hdră bhiăn knŭk kna, mđĭ kriê dlăng, răng mgang knông lăn ala čar, kriê dlăng kjăp mnuih mă bruă, kŭm păn, kdrăp êdah êdâo sơ wil, srăng ba nao klei găl răng mgang klei dưi êa ksĭ,  plao ksĭ; pŏk ngă bi jăk dŭm hdră msir bi kdơ̆ng trah mă kan hdang  soh hŏng hdră bhiăn (IUU); mbĭt anăn mđĭ lar kjăp klei srăng bi blah, mđĭ hnơ̆ng jăk mtô bi hriăm, ngă djŏ klei čiăng bruă klam hlăm boh klei mrâo.

“Klei mđing mkŏ mjing êpul lĭng kahan leh anăn anôk bruă lĭng kahan alŭ wăl kjăp kluôm, ngă djŏ klei čiăng bruă klam hlăm boh klei mrâo. Mđĭ lar kjăp bruă srăng mprăp bi blah, rơ̆ng mđĭ hnơ̆ng jăk mtô bi hriăm, klei bi hgŭm plah wah 3 êpul hlue si klei bhiăn, hlue si Hdră mtrŭn 03 mơ̆ng thŭn 2029 mơ̆ng Knŭk kna.”

Ƀri gưl anei, mă klei dưi mơ̆ng Phŭn bruă lĭng kahan, Êpul kahan 5, Đào Mỹ,  K’iăng  Khua Knơ̆ng bruă sang čư̆ êa čar Dak Lak mđup brei leh Hră pah mni mơ̆ng Khua phŭn bruă lĭng kahan  kơ 1 čô; mđup brei Hră pah mni mơ̆ng Êpul kahan 5 kơ 2 êpul, 7 čô mâo klei tŭ êdah kdlưn hlăm klei pŏk ngă bruă klam lĭng kahan 6 mlan akŏ thŭn 2026./.