Klei bi kƀĭn dưi pŏk ngă hluê hdră klă anăp lehanăn online truh 33 anôk mkŏ ti dŭm čar, ƀuôn prŏng. Khua anôk bruă kƀĭn ala mñă, wưng êgao jing sa wưng mdê mơ̆ng Êpul gơ̆ng bruă ƀuôn sang dŭm gưl, hlăk ala čar dôk tlă anăp hŏng lu klei dleh dlan, lông dlăng ka tuôm mâo: Klei ruă tưp Covid 19, klei yan adiê ngă, klei bi mlih yan adiê ba lu klei truh kjham, tar rŏng lăn dôk bi mlih pral, dleh dưi ksiêm dlăng. Đảng, Knŭk kna ba mdah, pŏk ngă lu hdră mtrŭn kơ bruă bi mlih gru hmô đĭ kyar, bi mlih mrô ala čar, mkra mlih anôk bruă, kah mbha gưl, kah mbha klei dưi lehanăn mkŏ dăp anôk bruă knŭk kna.

Hlăk êjai anăn, hŏng klei gĭt gai kjăp mơ̆ng Gưl dlông, Êpul gơ̆ng bruă ƀuôn sang dŭm gưl gĭr hgao jih klei dleh dlan, lŏ dơ̆ng mñă klă bruă klam jing anôk bruă knŭk kna mâo klei dưi ti alŭ wăl, bi ala kơ klei mĭn, klei čang hmăng lehanăn klei dưi mơ̆ng mnuih ƀuôn sang. Khă snăn, Khua anôk bruă kƀĭn ala lač, hdră pŏk ngă gru hmô bruă knŭk kna dua gưl adôk lu klei dleh dlan, lông dlăng, alŭ wăl kriê dlăng prŏng hĭn, bruă mă lu hĭn mơh, klei čiăng ăt lu mơh; klei thâo mơ̆ng phung knuă druh ti dŭm anôk adôk kƀah; anôk bruă nah gŭ, kdrăp hâo hưn ênuk mrâo ka mđrăm mbĭt. Khua anôk bruă kƀĭn ala Trần Thanh Mẫn mtă kơ Êpul gơ̆ng bruă ƀuôn sang dŭm gưl brei mâo klei gĭr, klei mĭn lehanăn hdră ngă bruă mrâo; čih mkra klei bhiăn kjăp, ba yua kdrăp kreh knhâo, mrâo mrang, bi mlih mrâo, bi mlih mrô, ba yua klei thâo anak mnuih hlăm klei mă bruă./.