Aguah ưm ti ƀuôn Tơ Drăh, să Bơ Ngoong, čar Gia Lai, Rôl, mnuih djuê ana Bahnar dôk dlăng kơ đang kphê bŏ hŏng êa nguôm. Ƀiă sơnăk pô thâo, giăm sa thŭn êlâo, ñu tuôm mâo arăng đoh ktŭng nao hgŭm “Bana Đêga Kon Kông”  - êpul phung bi kdơ̆ng mkŏ mjing lač dah klei đăo čiăng bi rai klei bi mguôp djuê ana. Rôl yăl dliê, kyua klei thâo săng ka kluôm, kreh mâo phung mâo mâo jăk mplư, hâo hưn klei mĭn soh čhuai kyuanăn ñu tŭ hĕ. Leh lu blư̆ mâo knuă druh, kahan ksiêm, mặt trận êpul bruă nao truh ti sang mtrŭt mjhar, ñu ƀuh klei jing mơ̆ng phung anăn čiăng bi rai lăn čar. Ară anei ñu hơĭt ai tiê mă bruă knuă, mđĭ kyar klei hdĭp mda gŏ sang, amâo mâo lŏ hmư̆ dŭm klei arăng duah mplư.

Nah tluôn anăn jing klei bi kdơ̆ng hgăm mơ̆ng bruă kđi čar nah gŭ. Anăn amâo djŏ knŏng jing bi kdơ̆ng hŏng hdră êlan thơ̆ng kơ bruă, ƀiădah êlâo hĭn jing lŏ sua wĭt klei đăo knang hlăm ai tiê mnuih ƀuôn sang.

Ti lu ƀuôn êlan ti krĭng taih kbưi čar Gia Lai, rup phung knuă druh mặt trận, kahan ksiêm să, êpul ƀĭng ngă lŏ hma, êpul bruă êdam êra…grăp hruê dôk mbĭt hŏng alŭ wăl jing leh klei mưn. Diñu huă ƀơ̆ng, dôk mbĭt hŏng mnuih ƀuôn sang, mđing hmư̆ klei čiăng, ruh mgaih klei dleh dlan, hâo hưn čiăng kơ mnuih ƀuôn sang thâo klă dŭm mnêč mơ̆ng phung bi kdơ̆ng. Amâo mâo uêñ kơ êlan klông taih kbưi, lu phung knuă druh nao ti sang mnuih ƀuôn sang, hnêč hlăm mmông bi kƀĭn êpul êya, grăp klei kƀĭn čiăng hâo hưn. Mâo đa đa srăng mtrŭt mjhar dŭm mlam, đa đa lu thŭn kơh dưi bi mlih klei thâo săng. Ƀiădah kyua klei siă suôr, jĕ giăm đru leh kơ mnuih ƀuôn sang thâo săng, knuă druh nao ti grăp sang amâodjŏ mâo bi rŭng amâodah bi kmhal, ƀiădah jing krơ̆ng klei êđăp ênang ƀuôn sang.

Hlăm klei bi kdơ̆ng anăn, phung khua mduôn, phung mâo kơhưm dưi dlăng jing khil mgang ƀuôn sang. Mduôn H’Mrik, pô mâo kơhưm ti să Biển Hồ, mâo mnuih ƀuôn sang bi hmô msĕ si kyâo prŏng  mgang ƀuôn sang mơ̆ng “Tin lành Đêga” leh anăn dŭm klei đăo čhuai mkăn mơ̆ng phung bi kdơ̆ng mkŏ mjing.

Lu blư̆, mâo phung jhat nao duah, ƀiădah hŏng klei tuôm ƀuh leh anăn klei răng, mduôn H’Mrik amâo mâo hmư̆ ôh leh anăn hur har mtrŭt mjhar mnuih ƀuôn sang amâo mâo hmư̆ leh anăn tŭ klei phung anăn.

 “Kâo ngă mduôn ƀuôn 23 thŭn anei. Kâo amâo mâo dŏ thâo ôh kyuanăn srăng gĭr, mbĭt hŏng Đảng đru kơ mnuih ƀuôn sang, nao êlâo hlăm grăp bruă, čiăng đru kơ mnuih ƀuôn sang hluê êlan Đảng, Knŭk kna, čiăng mâo klei hdĭp trei mđao yâo mơak. Jih jang mnuih ƀuôn sang hlăm ƀuôn mâo čhum ao siam, mâo sang dôk leh anăn mâo êdeh đĭ. Truh kơ ară anei, mnuih ƀuôn sang hlăm ƀuôn knŏng hmư̆ Đảng, Knŭk kna, amâo lŏ duah hmư̆ klei arăng ôh, phung duah mplư ƀuôn sang amâo mâo hmư̆ ôh. Ară anei hmei hơĭt ai tiê mă bruă, ngă pưk hma čiăng mđĭ kyar klei hdĭp mda gŏ sang - ƀuôn sang.”

Amâo djŏ knŏng jing anôk knang hlăm ai tiê, phung khua mduôn msĕ si H’Mrĭk lŏ krơ̆ng klei bi mguôp hlăm êpul êya. Êjai mâo gŏ sang dleh dlan, mduôn mtrŭt mjhar mnuih ƀuôn sang bi đru, êjai mâo klei amâo thâo bi djŏ, ñu jing pô bi mgrăng, mtrŭt mjhar phung êdam êra mă bruă knuă, hluê ngă djŏ hdră êlan mơ̆ng Đảng, hdră bhiăn lăn čar. Kyuadah diñu thâo klă, čiăng kơ mnuih ƀuôn sang amâo mâo hmư̆ klei arăng mplư, tal êlâo hĭn ƀuôn sang srăng hơĭt kjăp, klei hdĭp srăng trei mđao.

Mơ̆ng klei thâo săng anăn, dŭm hdră êlan bi hrŏ ƀun, mkŏ mkra krĭng ƀuôn sang mrâo, msir lăm sang dôk êjai, duh bi liê pui kmlă, êlan klông, sang hră mơar, anôk bruă mdrao mgŭn…mâo bruă Knŭk kna dŭm gưl ti Gia Lai ngă truh ti ƀuôn sang. Êjai klei hdĭp hơĭt, mnuih ƀuôn sang đăo knang kơ Đảng, Knŭk kna, dŭm klei duah mplư anăn ƀrư̆ ƀrư̆ luč ram, wăt hlăm phung tuôm nao soh êlan.

Hluê si Ra Lan Chung, khua Êpul gơ̆ng bruă ƀuôn sang čar Gia Lai, alŭ wăl dôk ngă lu hdră êlan čiăng đru kơ phung tuôm nao soh êlan lŏ wĭt ñŭ kma hŏng êpul êya, bi hơĭt klei hdĭp mda:

 “Hlăm wưng êgao iêo mkrum leh ai ktang mơ̆ng bruă kđi čar nao hgŭm msir dŭm klei dleh dlan mơ̆ng phung tuôm nao hgŭm hlăm Fulro wĭt hŏng yang ƀuôn, mtô mjuăt diñu. Ti alŭ wăl dôk ngă gru hmô wĭt hŏng klei đăo- krơ̆ng klei êđăp ênang ƀuôn sang dưi bi klă boh tŭ dưn, klei klă klơ̆ng.”

Nah tluôn dŭm klei bi mlih êđăp ênang ti dŭm ƀuôn êlan mâo klei săn asei mlei mơ̆ng êpul kahan ksiêm, lĭng kahan, dôk grăp hruê răng mgang klei êđăp ênang kơ mnuih ƀuôn sang. Dŭm êpul bruă hrăm mbĭt hŏng mnuih ƀuôn sang mđĭ kyar bruă duh mkra ala ƀuôn, thâo klă boh sĭt hlăm alŭ wăl, bi kdơ̆ng hŏng phung bi kdơ̆ng. Êjai mâo ai tiê mnuih ƀuôn sang, dŭm klei bi kdơ̆ng hŏng êpul bi kdơ̆ng, ngă bruă mjhua klei đăo čiăng bi kdơ̆ng hŏng Knŭk kna dưi mâo klei sa ai mơ̆ng mnuih ƀuôn sang. Hluê si Đại tá Phạm Hữu Trường, k’iăng khua kahan ksiêm čar Gia Lai, lu phung tuôm nao hlăm klei đăo soh čhuai, ƀuh klă klei soh čhuai mơ̆ng êpul anei, lŏ wĭt leh hŏng ƀuôn sang, jing mta phŭn jăk.

 “Boh nik, hŏng klei ngă bruă dưi ƀư̆ đa da phung kmeh gơ̆ng jing êpul hur har hlăm hdră jih jang mnuih ƀuôn sang răng mgang klei êđăp ênang lăn čar, mtrŭt mjhar lu phung nao êlan čhuai lŏ wĭt hŏng klei đăo phŭn, đru răng mgang klei êđăp ênang ti alŭ wăl.”

Êjai phung bi kdơ̆ng ăt duah êlan bi rai, čiăng rơ̆ng klei êđăp ênang kơ ƀuôn sang čiăng mâo klei hrăm mbĭt mơ̆ng bruă kđi čar, mơ̆ng mduôn ƀuôn, phung mâo kơhưm leh anăn mơ̆ng grăp čô mnuih ƀuôn sang. Sa klei kdơ̆ng mblah amâo mâo ênai phao ƀiădah dleh dlan, mă klei siă suôr čiăng ƀư̆ mkra, mă klei mđĭ kyar bruă duh mkra čiăng bi kjăp klei đăo knang, mă klei bi mguôp msưh kdŭn klei mĭn bi rai. Leh anăn klă sĭt, êjai mnuih ƀuôn sang thâo klă klei anăn, êjai Đảng, Knŭk kna leh anăn êpul bruă djŏ tuôm mâo klei đăo knang mơ̆ng mnuih ƀuôn sang, grăp klei bi kdơ̆ng, bi rai wăt mâo mnêč hgăm ăt srăng dưi bi rai. Kyua klei êđăp ênang mơ̆ng ƀuôn sang dưi krơ̆ng kjăp tal êlâo hĭn mơ̆ng ai tiê mnuih ƀuôn sang.