Dŭm hruê anei, anôk rŭ mdơ̆ng anôk dôk mrâo Kiên Long, să Bình An, čar Gia Lai mâo nanao ênai êdeh êdâo. Anei jing anôk dôk mrâo prŏng hĭn hlăm 9 alŭ wăl mơ̆ng hdră rŭ mjing êlan dơ̆ng pral Quy Nhơn - Pleiku, mâo boh prŏng hlăm boh 10ha.

Čiăng hmao ba jao hlăm mlan 7, mơ̆ng mlan 3 truh kơ ară anei, phunug ngă bruă ba leh dŭm pluh boh êdeh, mă bruă wăt hruê leh anăn mlam. Nguyễn Trung Cần,bi ala phung ngă bruă brei thâo, truh kơ ară anei, ênoh bruă rŭ mjing mâo leh hlăm brô 80%, bi leh dŭm mta bruă mđing tal êlâo čiăng ba jao 119 hlăm 250 čuê lăn kơ alŭ wăl.

“Êjai tŭ mă anôk ala djăp klei ngă ngă bruă, anôk bruă ba leh êbeh 30 boh êdeh dŭ mdiăng, 10 êdeh kčao, 6 boh êdeh čuk, 6 boh êdeh sơlô, mbĭt hŏng dŭm êtuh čô mă bruă wăt hruê leh anăn mlam čiăng bi leh bruă djŏ hdră kčah.”

Ti 9 anôk dôk mrâo ktuê êlan dơ̆ng pral, bruă mkŏ mkra dưi duh bi liê hrăm mbĭt hŏng êlan klông, pui mtrang mngač, êa jua, internet leh anăn msir êa čhŏ, mkŏ mjing wăl anôk kdrưh kơăm mrâo mrang.

Mă klei hưn kơ anôk lăn, Trần Văn Thông,  ti alŭ Kiên Long, să Bình An hơ̆k mơak kyua mâo anôk dôk mrâo mâo klei găl hĭn.

“Ênhă anôk dôk mrâo điêt hĭn ƀiădah srăng mrâo mrang hĭn. Tinei giăm êlan dơ̆ng mrô 19B, klei êrô êbăt găl hĭn. Bruă duh bi liê êa doh ăt msĕ mơh dŭm bruă mkŏ mkra jŭm dar anôk dôk mrâo mâo lu gru mngač hĭn.”

Bruă mbha čuê, dăp anôk dôk mrâo mbĭt hŏng bruă mkŏ mkra hrăm mbĭt mkŏ mjing leh klei sa ai mơ̆ng mnuih ƀuôn sang. Boh nik, hlăm wưng dôk guôn mkŏ kdrăp mkăp êa doh sa anôk, Bruă sang čư̆ êa čar Gia Lai lŏ đru brei ngăn prăk ktar ƀăng êa kơ hlăm brô 150 gŏ sang ti 5 alŭ wăl anôk dôk mrâo, đru kơ mnuih ƀuôn sang hơĭt ai tiê nao ti anôk dôk mrâo. Thái Văn Điểm, k’iăng khua adŭ bruă duh mkra să Bình An, čar Gia Lai brei thâo:

“Êpul kiă kriê hdră iêo gŏ sang nao ti knơ̆ng Bruă sang čư̆ êa să Bình An ngă klei mbah čuê lăn. Mnuih ƀuôn sang hơ̆k mơak kyua Knŭk kna duh bi liê, uêñ mĭn kơ bruă mkŏ mkra hrăm mbĭt.”

Êlan dơ̆ng pral Quy Nhơn - Pleiku mâo boh taih hlăm brô 43.700 êklai prăk. Čiăng đru kơ klei ruh mgaih anôk ala, čar Gia Lai rŭ mdơ̆ng leh 9 anôk dôk mrâo leh anăn 2 anôk dôk mrâo pluă mbĭt, dăp anôk dôk kơ êbeh 500 gŏ sang hmăi djŏ.

Tru kơ ară anei, jih jang 9 anôk dôk mrâo dưi mŭt hlăm wưng bi leh. Phạm Sĩ Duy Nhân, Êpul kiă kriê dŭm hdră êlan klông leh anăn bruă swil čar Gia Lai brei thâo, lu alŭ wăl msĕ si Trà Sơn, Thuận Đức, Trường Định 2 leh anăn Kiên Long dưi bi leh dŭm mta bruă mđing tal êlâo, ba jao lăn brei kơ dŭm alŭ wăl dăp anôk dôk mrâo.

“Bi hŏng êpul kiă kriê, hmei čŏng čô tiŏ nao mnuih mă bruă, bi mguôp hŏng klei đeu kčĕ ktuê dlăng phung ngă bruă, mđi mmông mă bruă, mă wăt hruê leh anăn mlam čiăng mtrŭt bi pral klei ngă bruă. Truh kơ ară anei, anôk dăp mnuih ƀuôn sang dưi ngă leh, leh anăn ba jao kơ să ngă klei mbha čuê, dăp anôk dôk kơ mnuih ƀuôn sang. Dŭm alŭ wăl adôk, Êpul kiă kriê ăt dôk mtrŭt bi pral čiăng bi leh hlăm mlan 7.”

Bruă mtrŭt bi pral bi leh dŭm anôk dôk mrâo ktuê êlan dơ̆ng pral Quy Nhơn- Pleiku ti Gia Lai amâo djŏ knŏng đru kơ mnuih ƀuôn sang hnưm hơĭt klei hdĭp, ƀiădah lŏ mkŏ mjing klei găl čiăng kơ hdră djŏ hdră kčah. Anei jing boh kdrŭt yuôm bhăn mtrŭt mđĭ klei mkŏ krĭng, pŏk mlar wăl anôk leh anăn boh kdrŭt mđĭ kyar bruă duh mkra ala ƀuôn kơ alŭ wăl.