Klei dleh dlan hĭn ară anei jing iêo jak leh anăn krơ̆ng jơ̆ng phung aê mdrao ti dŭm krĭng taih kbưi, krĭng mnuih djuê ƀiă kyua klei găl ka djăp leh anăn klei găl mă bruă adôk kƀah. Kluôm čar mâo 135 boh sang êa drao hŏng 369 anôk mdrao mgŭn, khădah 100% boh sang mdrao mâo leh sơăi aê mdrao mă bruă, ƀiădah boh sĭt čar ăt dôk kƀah giăm 500 čô mnuih mă bruă.

Mbĭt hŏng anăn, gru hmô bruă knŭk kna dua gưl ngă kơ anôk bruă sang čư̆ êa gưl să dôk mtŭk mtŭl hlăm bruă kriê dlăng, kƀah klei thâo sĭt hlăm hdră bi lông blei êa drao ăt msĕ mơh ba yua anôk mdrao mgŭn msĕ si sa anôk thơ̆ng ngă bruă hjăn.

Ti anăp klei dôk mâo anei, ti anôk mă bruă mrâo anei hŏng Êpul ksiêm dlăng bruă knuă mơ̆ng Knơ̆ng bruă kiă kriê klei mnuih ƀuôn sang čiăng bruă kƀĭn ala. Knơ̆ng bruă sang čư̆ êa čar Gia Lai akâo leh kơ gưl dlông hnưm ba mdah hdră mtrŭn bi sa hnơ̆ng kơ anôk mă bruă, ênoh mnuih mă bruă hluê hŏng hnơ̆ng mnuih leh anăn klei mdê bi alŭ wăl; mbĭt anăn đru kơ phŭn mkăp prăk duh bi liê mđrăm mbĭt anôk bruă nah gŭ, kdrăp mnơ̆ng kơ bruă mdrao mgŭn nah gŭ.

Lač klă kơ klei mâo mơ̆ng alŭ wăl leh anăn klei dôk bi mĭn mơ̆ng čar, Nguyễn Thị Thanh Lịch, K’iăng Khua Knơ̆ng bruă sang čư̆ êa čar Gia Lai brei thâo:

“Čar mâo leh lu hdră êlan kơ klei iêo jak ƀiădah amâo mâo ôh aê mdrao wĭt. Kơ anôk bruă mdrao mgŭn,  kơ sang êa drao dleh leh mơh, bi kơ să diñu amâo lŏ wĭt ôh. Ară anei hnơ̆ng iêô jak mnuih mă bruă lu hĭn hmei mâo jing 600 êklăk prăk kơ sa c̆ô aê mdrao, leh anăn mâo klei đru prăk mưn sang. Hmei mkŏ mjing hdră êlan tiŏ nao, bi mlih .Kyua tơdah ba mtrŭn ƀiădah amâo mâo kdrăp yua, amâo dưi ba yua snăn luč liê mnuih mă bruă, hlăk êjai ti gưl dlông, hmei dôk kƀah êdi".

Bi klă kơ klei klă mngač mơ̆ng čar Gia Lai hlăm bruă ktuê dlăng dŭm klei êdu kƀah, Êpul ksiêm dlăng čih yap Gia Lai jing sa hlăm dŭm alŭ wăl ba anăp hlăm bruă ba mdah dŭm hdră mtrŭn iêô jak phung aê mdrao. hă snăn, Êpul ăt mñă kơ čar brei mđĭ hnơ̆ng jăk wăl anôk mă bruă, mkŏ mjing hdră êlan mđĭ kyar leh anăn mtô mjuăt êdei kơ gưl prŏng čiăng kơ phung aê mdrao hơĭt ai tiê bi mguôp. Aduôn Trần Thị Nhị Hà, K’iăng Khua dhar bruă bi ala kơ mnuih ƀuôn sang mơ̆ng Bruă Kbĭn ala, Khua êpul ksiêm dlăng mñă ktang:

“Ya mta bruă Gia Lai čiăng, ya mta hdră êlan mâo klei ktang pioh mghaih msir dŭm klei dleh dlan, čar bi akâo, Êpul ksiêm dlăng srăng dlăng hŏng klei klă mngač, lehanăn djŏ hŏng mta kñăm čiăng mđrăm mbĭt bi ruh mgaih klei dleh kpăk. Jih jang mđing truh kơ mnuih ƀuôn sang, si bĕ ngă čiăng kơ phung ƀuônsang klă sĭt dưi dưn dŭm hdră êlan mâo phung khua kiă kriê Đảng, Knŭk kna dôk hmăng hmưi leh anăn čang hmăng."

Klei hrăm mbĭt leh anăn mđing hmư̆ mơ̆ng Anôk bruă kƀĭn ala srăng jing boh kdrŭt yuôm bhăn čiăng kơ Gia Lai ƀrư̆ ƀrư̆ ruh mtlaih "klei kƀah mnuih mă bruă", bi kjăp tur knơ̆ng bruă mdrao mgŭn nah gŭ, mkăp djŏ hŏng klei čang hmăng mơ̆ng mnuih ƀuôn sang ti krĭng čư̆ čhiăng Lăn Dap Kngư.