Mơ̆ng dŭm anôk čhĭ mnia đưm truh kơ anôk čhĭ mnia online leh anăn internet yang ƀuôn, lu mnơ̆ng ngă mgưt hruh čĭm iăt Khánh Hòa dưi ba čhĭ lu sơnăk. Amâo djŏ knŏng yua anăn msĕ, phung ngă mgưt lŏ mkra hruh, anăn knăl leh anăn logo čiăng mplư phung blei ba yua. Hluê si knơ̆ng bruă Yến sào Khánh Hòa, ară anei mâo 122 knơ̆ng bruă yua soh hŏng hdră bhiăn anăn knăl “Yến sào Khánh Hòa”, 42 knơ̆ng bruă bi ngă hră anăn mnia mblei leh anăn 55 anôk bruă ngă hră mơar anăn knăl mâo klei msĕ hŏng anăn knăl leh mâo pô. Ti Internet ăt mâo hlăm brô 280 pô account Facebook leh anăn website mâo klei bi knăl ngă mgưt.

Hlue si phung thơ̆ng kơ bruă, êjai mnơ̆ng mgưt mâo lu, klei hmăi amâo djŏ knŏng kơ knơ̆ng bruă ƀiădah lŏ hmăi klă anăp kơ phung rông čĭm iăt leh anăn dŭm anôk mkra mjing mnơ̆ng sĭt. Phung blei ba yua srăng luč klei đăo knang ngă klei kơ blei ba yua hrŏ, lu mnơ̆ng dhơ̆ng mgưt ngă msĕ, msĕ si hruh, anăn knăl, đa đa truh anôk mkra mjing mnơ̆ng amâo mâo djŏ čiăng mkŏ mjing klei đăo knang hŏng phung blei ba yua.

“Klei soh lu hĭn hŏng boh hră “Yến sào Khánh Hòa”,  anei jing boh hră mơ̆ng knơ̆ng bruă dưi rơ̆ng leh hlăm kluôm ala. Mrâo anei, hmei ƀuh lu mnơ̆ng dhơ̆ng soh, mkram jing ti anôk mkăn ƀiădah ăt čih “Yến sào Khánh Hòa”. Mâo dŭm mta mnơ̆ng čih anôk mkra mjing ti Khánh Hoà ƀiădah êjai nao ksiêm dlăng anôk anăn amâo mâo ôh. Lu phung blei ba yua diñu dlăng tinăn leh anăn diñu ƀuh “Yến sào Khánh Hòa” diñu mĭn jing hruh čĭm ăt mâo anôk mkra mjing ti Khánh Hoà mơ̆ng knơ̆ng bruă “Yến sào Khánh Hòa”

Năm mlan akŏ thŭn 2026, knơ̆ng bruă Yến sào Khánh Hòa mkra mjing êbeh 130 êklăk mnơ̆ng dhơ̆ng, mâo hnư hrui wĭt giăm 1.700 êklai prăk, mkŏ mjing bruă mă kơ giăm 3.900 čô mă bruă. Dŭm ênoh mrô anăn brei ƀuh bruă mkra hruh čĭm iăt đru mguôp lu kơ bruă druh mkra alŭ wăl. Čiăng răng mgang boh tŭ phung blei ba yua, knơ̆ng bruă Yến sào Khánh Hòa  siñê leh hdră bi mguôp ksiêm dlăng anôk mnia mblei, mgaih msir klei ngă soh hŏng klei dưi kiă kriê mnơ̆ng dhơ̆ng.