Blŭ gĭt gai ti anôk bi kƀĭn, Phạm Anh Tuấn – K’iăng khua bruă Đảng čar, Khua knơ̆ng bruă sang čư̆ êa čar Gia Lai bi myuôm bruă klam mơ̆ng kahan ksiêm Gia Lai păn kjăp bruă răng mgang klei êđăp ênang kđi čar, klei êdăp ênang yang ƀuôn wưng leh êgao. Mbĭt hŏng anăn mtă kơ jih jang êpul êya kahan ksiêm lŏ dơ̆ng mđĭ hĭn bruă klam jing kmeh gơ̆ng, thâo bi mguôp kjăp hŏng dŭm êpul êya dhar bruă, lehanăn bruă sang čư̆ êa hlue ngă tŭ jing 5 êpul bruă čuăn phŭn.

Hlăm anăn, păn kjăp boh klei mơ̆ng nah gŭ, pral mghaih msir jih klei dơ̆ng kčưm mâo phung ngă soh, gang mkhư̆ djăp mta klei soh, amâo mâo lui čăt đĭ dŭm anôk mrâo kơ klei amâo mâo jăk; đăm lĕ hlăm klei kdjăt hlăm djăp mta boh klei. Phạm Anh Tuấn mñă:

“Jih bruă kđi čar hlăm čar brei mâo klei thâo bi kjăp, hlăm klei knhêč, jih hnơ̆ng hlăm klei pral mbĭt hŏng bruă klam rơ̆ng dưi mâo klei êđăp ênang, rơ̆ng kjăp klei hơĭt ênang sĭt hlăm alŭ wăl, mjing atur kjăp pioh duh mĭn kơ mnuih ƀuôn sang, knư̆ hrue knư̆ jăk siam hĭn. Lŏ dơ̆ng mkŏ mjing, lehanăn mđĭ hĭn klei tŭ mơ̆ng bruă jih jang mnuih ƀuôn sang đru bi răng mgang klei êđăp ênang lăn čar, mâo klei thâo bi mguôp jih bruă kđi čar dưi bi răng mgang klei êđăp ênang, mơ̆ng anăn mjing ai bi ktưn prŏng, ba wĭt klei tŭ dưn hlăm mnuih ƀuôn sang.”

Blŭ hrăm tŭ mă bruă jao, Thiếu tướng Lê Quang Nhân, Khua knơ̆ng bruă kahan ksiêm čar Gia Lai brei thâo: Gưl kñăm êdi hlăm tal anei jing ngă bruă djŏ hŏng klei bruă Đảng čar, mơ̆ng knơ̆ng bruă sang čư̆ êa čar Gia Lai lehanăn phŭn bruă kahan ksiêm kiă kriê, bi êdah ai tiê kut kat hlăm bruă kđi čar răng mgang kjăp klei hdĭp mda êđăp ênang kơ mnuih ƀuôn sang, răng mgang kjăp klei êđăp ênang, mđĭ kyar bruă duh mkra ala ƀuôn hlăm čar.

Mơ̆ng ară anei truh krah mlan 9, jih jang êpul kahan ksiêm srăng mđing hlăm bruă gang mkhư̆ phung ngă soh huĭ hyưt, phung ngă soh mâo êpul, phung brei čan prăk hŏng mnga ktrŏ, phung ngă soh ma tuĭ, phung knĕ tlĕ dăp, klei ngă soh hŏng hdră bhiăn kơ wăl hdĭp mda, klei mă mnơ̆ng hlăm gŭ lăn soh hŏng klei bhiăn, lehanăn klei ngă soh hlăm kdrăp mrâo mrang.

Sa hlăm dŭm mta mrâo anăn jing kahan ksiêm čar Gia Lai mko mjing lehanăn ngă klei ksiêm kluôm mbĭt pia mrô 151 – mâo 2 êpul gưl čar lehanăn mrô 135 êpul bruă gưl ƀuôn hgŭm, bi mguôp klei hgŭm hlăm bruă, mbĭt hŏng êpul lĭng kahan, hmao gang mkhư̆ kjăp klei amâo mâo jăk hlăm alŭ wăl. Êpul êya anei srăng mghaih msir ktang jih jang phung ngă klei bi rŭng, msĕ si klei bi mtiŏ êdeh soh hŏng klei bhiăn, phung ngă soh hlăm êlan klông, lehanăn dŭm anôk amâo mâo êđăp ênang hlăm yang ƀuôn. Thiếu tướng Lê Quang Nhân lač:

“Jih jang phung knuă druh lĭng kahan, mâo nanao ai tiê thâo bi mguôp, mprăp kơ klei bi blah, gĭr hgao jih klei dleh dlan, bi leh jăk bruă kčah jao, hdơr čih pioh lehanăn kđăp hlăm ai tiê ngă bi dưi djăp mta bruă jing klei djŏ, wơr asei mlei pô mă bruă kơ mnuih ƀuôn sang bi êdah klei myưng m’ang prŏng. Jih jang êpul kahan ksiêm čar mâo klei thâo gĭr amâo mâo mdei, mjing pô knơ̆ng hlăm bruă răng mgang klei êđăp ênang, kut kat bi leh bruă kčah jao.”

Leh ruĕ klei bi kƀĭn, mâo lu phung knuă druh, kahan ksiêm nao hlăm klei mdah bruă bi meh, mdah klei ktang êpul kahan ksiêm, bi êdah ai tiê kmlăn, jhŏng mprăp ai tiê kơ klei bi blah hlăm êpul kahan ksiêm. Ti anôk trŭn hlăm bruă, kahan ksiêm čarăt mkŏ mjing klei ruĕ mâo hlăm anăn lu mta êdeh êdâo pioh kơ bruă knuă, êdeh pioh mjing anôk gang hlăm êlan klông, êdeh pruih êa bi kdơ̆ng hŏng phung ngă klei bi rŭng, êdeh đru dŏng.