Anôk bruă kiă kriê bruă Đảng čar Gia Lai mâo leh klei bi tŭ ư hlue ngă dŭm hdră êlan hlue djŏ hŏng hdră mtrŭn mrô 72 mơ̆ng phŭn bruă kđi car, kñăm mđĭ hĭn bruă răng kriê, lehanăn mđĭ klei suaih pral mnuih ƀuôn sang. Hlăm anăn, năng mđing êdi jing hdră duh bi liê giăm 300 êklai prăk kơ bruă mdrao mgŭn nah gŭ ti krĭng knông lăn, krĭng dleh dlan hlăm čar Gia Lai.

Čar Gia Lai srăng duh bi liê, rŭ mdơ̆ng, mkra mđĭ lehanăn blei mprăp kdrăp mă bruă kơ 24 boh sang êa drao hlăm ƀuôn hgŭm dôk hlăm krĭng knông lăn, krĭng dleh dlan. Dŭm mta bruă dưi pŏk mlar hŏng dŭm anôk bruă djŏ tuôm, mkra mrâo anôk mkă dlăng klei ruă, anôk mă rup, anôk mkă dlăng êrah, anôk siêu âm, anôk dŏng mdrao tal êlâo, anôk mghaih msir êa djah mơ̆ng sang êa drao Ênoh bi liê kơ jih jang bruă anei tĭng hlăm brô 288 êklai prăk, hlăm anăn mâo 216 êklai prăk pioh mkra mđĭ, pŏk phai sang êa drao, lehanăn hlăm brô 72 êklai prăk pioh blei mprăp kdrăp mă bruă, msĕ si masin siêu âm, masin mkă dlăng kman, kdrăp dŏng mdrao lehanăn mkhư̆ mdrao kman. Mbĭt hŏng bruă duh bi liê, čar Gia Lai ăt bi êdah hdră êlan hlue ngă bruă mkă dlăng jêñ jêñ klei ruă amâo mâo mă prăk ôh kơ mnuih ƀuôn sang ti 12 boh ƀuôn hgŭm knông lăn, plao kdĭ lehanăn boh nik alŭ wăl dleh dlan./.