Sang kbưi hŏng knơ̆ng kdơ̆ng êa Dak N’Ting hlăm brô 500 m ti nah tluôn, K’Thu, djuê ana Mnông, alŭ Quảng Tiến, să Quảng Sơn čŏng pô atăt ba mô̆ mbĭt hŏng 2 čô anak nao dôk ti sang kmha ti wăl krah să kñăm ñĕ đuĕ hŏng klei huĭdah mčah knơ̆ng kdơ̆ng êa. Hjăn K’Thu dôk dlăng sang, mă bruă pưk hma lehanăn hdĭp hlăm klei huĭ hyưt.

  “Mnuih buôn sang hdĭp ti tluôn knơ̆ng kdơ̆ng êa anei huĭ hyưt êdi, adiê hjan lu snei êla ñu čiăng mčah yơh amâo thâo êlâo. Akâo kơ bruă knŭk kna tơdah amâo mkra, amâo dưi msir mghaih ôh, jăk hĭn hlŏng bi rai yơh knơ̆ng kdơ̆ng êa anei. Lui snei gŏ sang hmei hdĭp ti tluôn tơdah mâo klei truh êa hlŏng kpuh mđung jih yơh.

Vũ Tiến Lư, Khua bruă Đảng kdriêk Dak Glŏng, čar Dak Nông brei thâo, mlan 8/2023, leh mâo klei truh klưh hroh, kđang knơ̆ng kdơ̆ng êa Dak N’ting, să Quảng Sơn, kdriêk pŏk leh hdră mbĕ 34 gŏ sang mơ̆ng nah tluôn. Leh sa wưng, mnuih ƀuôn sang lŏ wĭt dôk lehanăn mă bruă tinei. Ară anei, lŏ mŭt hlăm yan hjan, klei huĭ srăng mčah knơ̆ng kdơ̆ng êa anei prŏng snăk, brei pral mâo hdră mghaih msir rơ̆ng klei êđăp ênang kơ mnuih ƀuôn sang.

“Knơ̆ng kdơ̆ng êa Dak N’ting 1 thŭn hŏng anei jhat rai ka dưi bi mklă mta phŭn. Kyua anăn, kâo akâo brei hnưm ksiêm duah mta phŭn lehanăn pral msir mghaih klei jhat anei.

Bruă msir mghaih, mkra mđĭ hdră knơ̆ng kdơ̆ng êa Dak N’ting klưh hroh lehanăn kđang jing bruă mjêč ară anei. Khă snăn, Phạm Tuấn Anh, Khua knơ̆ng bruă Lŏ hma lehanăn mđĭ kyar krĭng ƀuôn sang čar Dak Nông lač, dôk mâo klei mtŭk mtŭl lehanăn êmưt bi mklă mta phŭn ăt msĕ mơh bruă mkra mđĭ bruă anei. Bŏ leh 1 thŭn ƀiădah ka thâo klă mta phŭn kyua hdră mkra amâo mâo kjăp hĕ amâo dah kyua yan adiê ngă. Hluê Phạm Tuấn Anh, mâo anôk bruă ngă mkra “dêč” ksiêm bi mklă mta phŭn klei anei.

       “Klei dleh dlan jing dưi duah sa êpul êya đru kčĕ mâo klei thâo čiăng ngă bruă klam anei. Hlăm hdră ngă, hmei jak iêu lu êpul êya hriê ksiêm dlăng ƀiădah leh ksiêm dlăng diñu hlŏng đuê̆ hĕ, ngă kơ hdră mghaih msir êmưt êdi. Truh giăm anei, Knơ̆ng ksiêm dlăng knơ̆ng kdơ̆ng êa tŭ ư, ară anei mâo leh klei kuôl kă hluê ngă bruă anei.

Knơ̆ng kdơ̆ng êa Dak N’ting mâo ênoh duh 137 êklai prăk, mơ̆ng phŭn mkăp prăk Hdră mdrơ̆ng hŏng klei yan adiê ngă lehanăn mđĭ kyar mtah wwưng thŭn 2016 – 2020 lehanăn phŭn mkăp prăk alŭ wăl. Hdră anei mâo Anôk kriê dlăng dŭm hdră duh bi liê rŭ mdơ̆ng čar Dak Nông ngă pô duh bi liê. Akŏ mlan 8/2023, hdră klưh hroh, kđang hlăk mgơ̆ng bŏ êa. Anôk gĭt gai mơ̆ng ala čar kơ hdră mdrơ̆ng hŏng klei yan adiê ngă mâo K’iăng khua Phŭn bruă Lŏ hma lehanăn mđĭ kyar krĭng ƀuôn sang Nguyễn Hoàng Hiệp, K’iăng khua êpul djă akŏ nao ksiêm dlăng lehanăn gĭt gai hdră msir. Anôk bruă sang čư̆ êa čar Dak Lak gĭt gai pral bi mklă mta phŭn lehanăn brei mâo hdră msir mghaih, ƀiădah ară anei ăt dôk sa anôk. Hồ Văn Mười, Khua Anôk bruă sang čư̆ êa čar Dak Nông lač, kƀah klei đua klam hlăm bruă msir mghaih klei kơ knơ̆ng kdơ̆ng êa Dak N’ting.

    “Bi kƀĭn mtă mtăn nanao wăt hŏng hră m’ar, lač lu blư̆ ƀiădah amâo ngă, tơdah Dak N’ting yan hjan anei klưh mčah, mâo klei truh hmăi kơ klei hdĭp mnuih ƀuôn sang, hlei srăng đua klam. Êbeh 1 thŭn hŏng anei leh, truh ară anei mrâo dưi duah anôk bi mklă, ƀiădah čiăng bi mklă hlăm yan hjan anei ăt jing sa klei dleh mơh”.

         Gưl dlông gĭt gai mjêč, mtrŭt msĕ snăn ƀiădah bruă bi mklă mta phŭn lehanăn hdră msir mghaih klei klưh hroh, kđang knơ̆ng kdơ̆ng êa Dak N’ting, să Quảng Sơn, kdriêk Dak Glŏng, čar Dak Nông dôk êmưt êdi. Hlăk êjai anăn, klei huĭ mčah knơ̆ng kdơ̆ng êa anei srăng mâo huĭ hyưt êdi hlăm yan hjan, hmăi truh kơ klei hdĭp lehanăn ngăn drăp mnuih ƀuôn sang ti krĭng nah tluôn./.