Êdah kdlưn mơ̆ng boh klei kƀah lăn mkra mjing jing hdră bruă ktuê êlan ktuê hang ksĭ Vạn Ninh – Ninh Hòa taih hlăm brô 25 km, ênoh bi liê êbeh 2000 êklai prăk. Hdră bruă anei čiăng hlăm brô 1,3 êklăk m kip lăn, ƀiădah kƀah phŭn mkăp kyua anăn hnơ̆ng rŭ mdơ̆ng mrâo mâo hlăm brô 30%. Trần Minh Chiến, Khua Anôk bruă kriê dlăng Wăl duh mkra leh anăn dŭm Wăl tuh tia mkra mjing čar Khánh Hòa rŭng răng:

Êlan ktuê hang ksĭ ară anei rŭ mdơ̆ng dleh dlan kyua kƀah lăn dơr. Kƀah lăn dơr srăng hmăi kơ klei ruh mgaih prăk bi liê knŭk kna. Kơ anăp, dŭm wăl tuh tia mkra mjing pŏk ngă rŭ mdơ̆ng anôk bruă nah gŭ ăt srăng kpăk đuôm mơh. Mơ̆ng ară anei mtam, pô bi liê rŭng răng snăk kyua amâo mâo lăn dơr, hlăk klei bi kna klei lăn, dơr lăn dôk kƀah lu snăk lăn čiăng dơr.”

Hlue si Knơ̆ng bruă lŏ hma leh anăn Wăl hdĭp mda čar Khánh Hòa, dŭm hdră bruă ti čar Khánh Hòa dôk čiăng hlăm brô 6,3 êklăk m kip mnơ̆ng čuk hli leh anăn 350 êbâo mkip boh tâo rŭ mdơ̆ng. Čiăng msir mgaih boh klei kƀah phŭn mkăp, phung bi liê dôk ba lăn boh tâo êbeh mơ̆ng hdră rŭ mdơ̆ng dŭm hdră bruă êlan klông mkăn. Ară anei hnơ̆ng mnơ̆ng mkra mjing êbeh ti dŭm kdrăn djah hlăm broo 3,3, êklăk met kip. Phạm Văn Hòa, K’iăng Khua Anôk bruă kriê dlăng dŭm hdră bruă lŏ hma leh anăn êlan klông čar Khánh Hòa brei thâo, bruă tiŏ nao jing čiăng êdi:

“Bruă anei srăng mâo lu klei tŭ dưn kyua pral mâo phŭn mnơ̆ng dhơ̆ng mơ̆ng hdră bruă, dưi bi hrŏ djah djâo. Kyua msĕ si hdră bruă Khánh Hòa-Ƀuôn Ama Thuôt ăt dleh dlan kyua amâo mâo lu anôk tuh. Klei ba kơ hdră bruă mkăn srăng hrŏ lu ênoh bi liê kơ jih 2 hdră bruă”.

 Boh klei hin mnơ̆ng dhơ̆ng mkra mjing ti Khánh Hòa mphŭn mơ̆ng klei čiăng lu snăk hlăk êjai phŭn mkăp tinăn mtam adôk kƀah, hră mơar mkăp brei hră mơar duah mă mnơ̆ng leh anăn hnơ̆ng yua dŭm anôk mă mnơ̆ng ăt luč lu hruê mmông. Čiăng msir mgaih truh phŭn agha, êngao kơ bruă ba nao mnơ̆ng mkra mjing, čar Khánh Hòa dôk ktuê dlăng dŭm krĭng wăl djăp klei găl ba yua, mâo hdră msir kriê dlăng ngăn dŏ mnơ̆ng hlăm gŭ lăn hlăm Hdră čuăl mkă čar. Mbĭt hŏng anăn, ksiêm dlăng bi mklă dŭm krĭng wăl amâo dưi bi lông dưi mă mnơ̆ng hlăm gŭ lăn kñăm mkăp mnơ̆ng dhơ̆ng kơ dŭm hdră bruă phŭn. Lê Huyền,  K’iăng Khua Knơ̆ng bruă sang čư̆ êa čar Khánh Hòa mtă dŭm phung bi liê, anôk bruă kčĕ brei prak mơ̆ng hdră mprăp kơ hdră bruă, ksiêm dlăng bi nik phŭn mkăp čiăng mkŏ mjing hdră bruă djŏ guôp, ñĕ kơ klei gun kpăk hlăm hdră bruă pŏk ngă:

“Dŭm anôk bruă kriê dlăng hdră bruă brei pral msir klei mâo: Hdră bruă pô čiăng kơ ya mta mnơ̆ng mkra mjing? Ti anôk? Dŭm ênoh? Ñĕ kơ klei mnơ̆ng dhơ̆ng anăn ya dŏ, ti anôk leh anăn dŭm amâo dưi wĭt lač ôh. Tơdah amâo dưi wĭt lač ôh ti anôk snăn amâo dưi wĭt lač ôh jing amâo thâo ôh ya tur knơ̆ng čiăng mĭn tĭng srăng ba yua hlăm hdră bruă, kyua kbưi 3 km amâodah 5km srăng mdê mdê. Atăt kơ klei dleh dlan kơ bruă lŏ hma - wăl hdĭp mda  hlăm bruă duah anôk, klei kčĕ, ba hlăm hdră čuăl mkă.”