Blŭ hrăm hlăm klei kƀĭn trông, Khua Bruă Kbĭn ala Trần Thanh Mẫn lač, ksiêm wĭt wưng păn bruă Bruă Kbĭn ala gưl 15 jing sa wưng păn bruă dleh dlan, klei lông dlăng ti anăp Klei ruă tưp Covid-19, tar rŏng lăn mâo lu klei bi mlih, hlăm lăn čar angĭn êbŭ, êa lêč, ngă klei bi khuăt mnuih mă bruă Knŭk kna. Hlăm wưng anăp, Bruă Kbĭn ala mâo klei gĭr, kjăp hŏng hdră êlan mơ̆ng Đảng, hdră bhiăn lăn čar hŏng bruă ênoh bruă lu. Mâo wưng Bruă Kbĭn ala mă bruă hruê, mă bruă mlam, mă wăt knăm 6, knăm 7 đru kơ klei bi khuăt mnuih mă bruă, mkŏ mjing ngă bruă tŭ dưn…

Khua Bruă Kbĭn ala Trần Thanh Mẫn pah mni dŭm boh tŭ dưn dưi mâo hlăm thŭn 2025 leh anăn wăt wưng păn bruă Bruă Kbĭn ala gưl 15. Mtrŭt mjhar hdră bi lông ktưn hlăm wưng kơ anăp, khua Bruă Kbĭn ala lač, wưng păn Bruă Kbĭn ala gưl 16 jing ktrŏ êdi, srăng lŏ dơ̆ng mlih mrâo klei mĭn mkŏ mjing hdră bhiăn, ngă dŭm hdră êlan, klei bi klă mơ̆ng Phŭn bruă kđi čar, Êpul khua bruă Đảng, čiăng kơ bruă duh mkra - ala ƀuôn đĭ kyar, rơ̆ng kơ bruă lĭng kahan, mkŏ mjing bruă kđi čar. Klei kñăm knhal tuč jing mđĭ hnơ̆ng klei hdĭp mơ̆ng mnuih ƀuôn sang.