Ti anôk bi tuôm, dua tĭng bi mklă hdră bi hgŭm răng mgang klei êđăp ênang ƀrư̆ hruê mâo bruă klam yuôm bhăn hlăm klei bi mjĕ dua ala čar lehanăn mñă srăng ngă bi êlam hĭn klei bi hgŭm plah wah anôk bruă răng mgang klei êđăp ênang, hluê ngă klei bhiăn lehanăn tă hdră êlan. Hluê hŏng klei bi mjĕ Ƀĭng hgŭm phŭn kluôm dhuôm Việt Nam – India, Khua gĭt gai Đảng, Khua lăn čar Tô Lâm lehanăn Pô đru kčĕ bruă răng mgang klei êđăp ênang ala čar India Ajit Doval mñă kơ klei čiăng bi hgŭm tŭ dưn hlăm hdră bi kdơ̆ng hŏng klei ngă măk ƀai, klei ngă soh hluh ala čar, klei mplư online lehanăn dŭm klei arưp aram mrâo, mơ̆ng anăn đru rơ̆ng kjăp klei êđăp ênang ti grăp ala čar.

Dua tĭng ăt tŭ ư mtrŭt mđĭ klei bi hgŭm plah wah hdră răng mgang klei êđăp ênang lehanăn mđĭ kyar, pŏk mlar hdră bi hgŭm hlăm bruă kdrăp mrâo msĕ si klei thâo anak mnuih, mlih mrô, mlih mrâo, bruă pui kmlă doh lehanăn mjuăt bi hriăm mnuih mă bruă mâo klei thâo. Kơ boh klei hlăm krĭng lehanăn tar rŏng lăn, dua tĭng tŭ ư rơ̆ng kjăp klei êđăp ênang, hơĭt ênang, klei êngiê êlan êa, êlan phiơr; msir mghaih klei bi kuan hŏng hdră msir êđăp ênang hluê djŏ hdră bhiăn tar rŏng lăn, boh nik Klei kuôl kă Êpul hgŭm lu ala čar kơ Hdră bhiăn Êa ksĭ 1982 (UNCLOS 1982).

Ăt hlăm hdră nao čhưn truh ti India, mmăt 5/5, Khua gĭt gai Đảng, Khua lăn čar Tô Lâm nao čuă, gĭt gai knăm bi tuôm hŏng knuă druh ti Anôk bruă bi ala lehanăn mnuih ƀuôn sang Việt Nam dôk ti India./.