Hlăm jar gưl nao čhưn Knŭk kna ti Philippines, hruê 01/6, leh nao hlăm Knăm drông gưl knŭk kna ti Malacanang, ƀuôn prŏng phŭn Manila, Khua gĭt gai Đảng, Khua lăn čar Tô Lâm mâo  klei bi trông hŏng Khua mil čhil Philippines Ferdinand Romualdez Marcos Jr.  Hlăm klei bi trông, dua khua gĭt gai bi tŭ ư mâo klei hưn mdah mbĭt mđĭ klei bi hgŭm Việt Nam - Philippines jing ƀĭng hgŭm phŭn, pŏk ênuk mđĭ kyar mrâo kơ klei bi hgŭm dua nah.

Hŏng bruă mđĭ jar bi hgŭm jing Ƀĭng hgŭm phŭn mđĭ hĭn, dua tĭng bi tŭ ư bi hgŭm hŏng klei mkŏ mjing Hdră ngă bruă pŏk ngă jar bi hgŭm mrâo hlăm wưng kơ anăp. Kơ dŭm bruă krĭng wăl leh anănh lu ala čar, dua khua gĭt gai bi mklă lŏ dơ̆ng mđĭ jing klei bi hgŭm kjăp,  bi sa ai hlăm dŭm klei bi kƀĭn lu tĭng, boh nik jing Êpul hgŭm lu ala čar leh anăn ASEAN. Dua khua gĭt gai tŭ ư mđĭ  dŭm Phŭn, dhar bruă leh anăn alŭ wăl dua ala čar bi hgŭm kjăp, pŏk ngă tŭ dưn dŭm klei kuôl kă mâo leh plah wah Khua gĭt gai dua ala čar, đru na klei bi hgŭm phŭn  Việt Nam – Philippines hlăm wưng đĭ kyar mrâo.