Blŭ hrăm hlăm mmông mă bruă, Khua gĭt gai Đảng, Khua Lăn čar Tô Lâm mñă klă 3 boh phŭn prŏng hlăm anăn čiăng dưm bruă tuh tia mkra mjing êa ksĭ ala čar hlăm hdră mkŏ mjing Việt Nam jing ala čar mâo êa ksĭ ktang. Anei jing tur knơ̆ng bruă tuh tia mkra mjing phŭn, mkăp kơ hdră mđĭ kyar bruă duh mkra êa ksĭ, mkŏ mkra anôk bruă êlan klông, răng mgang klei êđăp ênang leh anăn mđĭ klei dưi ngă phŭn hdră êlan.

Lač kơ bruă klam ti anăp, Khua gĭt gai Đảng, Khua lăn čar mtă, mđing pŏk mlar wăl anôk mnia mblei, ba yua tŭ dưn klei găl mâo leh anăn msir mghaih 06 klei gun kpăk; Bruă Đảng Knŭk kna gĭt gai pral mkŏ mjing Hdră ala čar kñăm mđĭ kyar bruă mkra mjing êa ksĭ hŏng kŭm păn truh thŭn 2035, hnơ̆ng trah dlăng 2050. Kơ wưng sui, Khua gĭt gai Đảng, Khua Lăn čar Tô Lâm mtă, brei bi mlih mơ̆ng bruă krơ̆ng kjăp klei dưi mkra mjing jing mkŏ mjing wăl anôk tuh tia mkra mjing êa ksĭ leh anăn êlan êa mrâo mrang, mtah, mrô, dưi čŏng ngă lehanăn bi ktưn hŏng tar rŏng lăn.