Klei bi kƀĭn čih yap, bi mni kơ boh tŭ êdah kdlưn mơ̆ng êpul Kahan ksiêm yang ƀuôn hlăm wưng êgao, bi mklă anei jing êpul mâo klei đru mguôp yuôm bhăn hlăm boh tŭ dưn mbĭt mơ̆ng lăn čar. Khua gĭt gai Đảng, Khua lăn čar mñă klă, mơ̆ng akŏ thŭn 2026 truh ară anei, Bruă Đảng kahan ksiêm gưl dlông lŏ dơ̆ng mđĭ lar ai tiê jih ai tiê hŏng Đảng, hŏng mnuih ƀuôn sang, mđĭ hnơ̆ng jăk đru  kčĕ leh anăn pŏk ngă bruă klam phŭn.

Kơ bruă phŭn 6 mlan knhal jih thŭn, Khua gĭt gai Đảng, Khua lăn čar Tô Lâm mñă klă dŭm mta bruă, hlăm anăn, gĭr pŏk ngă bruă răng mgang klei êđăp ênang ala čar hlue si hdră djŏ klei mĭn, klei thâo săng mrâo mơ̆ng Đảng, pŏk mlar hnơ̆ng răng mgang, mđĭ klei thâo, kriê pioh klei êđăp ênang ala čar hlăm djăp boh klei. Kƀĭn kčĕ mkŏ mjing ala ƀuôn kjăp, êđăp ênang, jăk siam, đĭ kyar. Lŏ dơ̆ng bi mklă bruă klam bi hmô hlue ngă Hdră mtrŭn mrô 57 mơ̆ng Phŭn bruă kđi čar kơ klei êdah kdlưn mđĭ kyar klei kreh knhâo kdrăp mrâo, mlih mrâo mbruă leh anăn mlih mrô.