Blŭ hrăm ti knăm anei, Khua gĭt gai Đảng, Khua lăn čar Tô Lâm mñă, knuă druh mặt trận brei mâo klei thâo bruă kđi čar, mâo kơhưm hlăm êpul êya, mâo klei thâo mtrŭt mjhar, thâo bi blŭ hrăm, mđĭ ai, bi tăng mgăl, msir mghaih klei mâo; amâo dưi kbưi hŏng mnuih ƀuôn sang, amâo djŏ knŏng mă bruă hluê klei hưn mthâo; brei nao truh ti djăp anôk, mđing hmư̆ klei blŭ, lač djŏ klei sĭt, ba mdah djŏ anôk, tui ksiêm boh tŭ ba wĭt; čiăng kơ bruă Mặt trận giăm mnuih ƀuôn sang hĭn, lač mnuih ƀuôn sang thâo săng, ksiêm dlăng bruă msir mghaih klei akâo čiăng mơ̆ng mnuih ƀuôn sang hŏng klei klă mngač.

Khua gĭt gai Đảng, Khua lăn čar Tô Lâm mtă kơ bruă Mặt trận brei tui ksiêm kơ dŭm klei hlak mblang, ksiêm wĭt boh sĭt mơ̆ng hdră bi hgŭm mguôp jih jang djuê ana, klei mnuih ƀuôn sang ngă phŭn mil pô, klei dưi êngiê mơ̆ng mnuih ƀuôn sang jing bruă klam yuôm bhăn.

 Đru kčĕ hlăm bruă mkŏ mkra lehanăn pŏk ngă Hdră êlan bi hgŭm mguôp jih jang djuê ana truh kơ thŭn 2035, hnơ̆ng trah dlăng truh thŭn 2045; bi klă klei bhiăn, hdră kñăm mđĭ lar ai ktang hlăm mnuih ƀuôn sang, ai ktang hlăm bruă dhar kreh, hlăm anak mnuih Việt Nam.