Nao mbĭt mâo Khua knŭk kna Lê Minh Hưng, Khua bruă kƀĭn ala Trần Thanh Mẫn lehanăn Khua êpul kiă kriê bruă Đảng gưl dlông Trần Cẩm Tú. Klei bi tuôm anei bi êdah klei mđing mơ̆ng Đảng, Knŭk kna hŏng mnuih ƀuôn sang djăp djuê ana, bi klă bruă klăm knư̆ hrue knư̆ yuôm bhăn mơ̆ng êpul phung bi ala jing mnuih djuê ƀiă hlăm bruă kđi čar. Blŭ hrăm siă suôr hŏng phung bi ala, Khua gĭt gai Tô Lâm mñă bruă kƀĭn ala hlăm wưng tinăp lŏ dơ̆ng mlih mrâo  hŏng klei kjăp hĭn, hlăm anăn phung bi ala bruă kƀĭn ala mnuih djuê ƀiă ƀrư̆ hrue mâo bruă klam hĭn hlăm bruă mkŏ mjing hdră êlan, ksiêm dlăng bruă hlue ngă, lehanăn jing phung mkŏ plah wah bruă kƀĭn ala hŏng mnuih ƀuôn sang.

Čiăng dưi bi sĭt hlăm wưng mđĭ kyar mrâo, Khua gĭt gai Tô Lâm mtă, lŏ dơ̆ng mlih mrâo klei mĭn kơ bruă djuê ana lehanăn hdră êlan djuê ana, boh phŭn jing đru mjing djăp klei găl mđĭ kyar klei hdĭp mda bi hrŏ ƀun, mđĭ ênoh mâo ba wĭt klei hdĭp mda bi mlih sĭt, bi hrŏ klei bi kpleh, lehanăn rơ̆ng mâo klei mtăp mđơr sĭt. Êjai klei anăn, phung bi ala mnuih djuê ƀiă brei bi êdah ênŭm dŭm mta klei dôk gun kpăk hlăm nah gŭ, akâo dŭm hdră êlan djŏ guôp mơ̆ng dŭm alŭ wăl mdê mdê, mơ̆ng mdê bi djuê ana. Jih jang klei akâo brei kbiă hriê mơ̆ng bruă sĭt, năng dưi ngă lehanăn anăp ba wĭt klei tŭ dưn klă mngač./.