Ti anăp dŭm klei kpĭ ênoh bi liê kyua ênoh mnơ̆ng yua đĭ yuôm, klei truh yan adiê, klei ruă tưp dleh ksiêm dlăng leh anăn klei čuăn hnơ̆ng jăk brư̆ hruê ƀrư̆ ktang, Êpul hgŭm bruă Vĩnh Cường ti să Vĩnh Mỹ (čar Cà Mau) kñăm mtrŭt mđĭ klei nao hgŭm bi mguôp mkra mjing - ba čhĭ hluê si hdră êlan 1 êklăk ha mdiê hnơ̆ng jăk, êwa čhŏ ƀiă krĭng dap mnai krông Cửu Long. Ară anei, hnơ̆ng mkra mjing bruă lŏ hma mơ̆ng Êpul hgŭm bruă Vĩnh Cường jing êbeh 10.000ha, hlăm anăn mâo hlăm brô 5.000ha hluê hnơ̆ng čuăn hnơ̆ng jăk. Klei mdê hlăm klei bi mguôp jing nao klei nao hgŭm mơ̆ng knơ̆ng bruă mơ̆ng mphŭn kčưm. Bruă mkăp brei mjeh, mtô hdră mnêč mkra mjing, ksiêm dlăng hnơ̆ng jăk čiăng hrui blei dưi ngă djŏ hŏng klei kuôl kă.

Trịnh Văn Cường – khua êpul hgŭm bruă Vĩnh Cương brei thâo, boh tŭ dưn mơ̆ng klei bi mguôp amâo djŏ knŏng mđĭ hnư hrui wĭt ƀiădah wăt bi mlih klei mĭn mkra mjing mơ̆ng ƀĭng ngă lŏ hma. Mơ̆ng klei bi tiŏ êran hŏng mnơ̆ng dhơ̆ng, phung hgŭm hlăm êpul hgŭm bruă bi mlih jing kñăm kơ hnơ̆ng jăk, tui duah phŭn agha leh anăn klei doh êbăt mnơ̆ng ƀơ̆ng. Trịnh Văn Cường brei thâo:

Êpul hgŭm bruă amâodưi bi êran hŏng hdră hđăp, kƀah klă mngač, kbah klei mbha leh anăn čiăng nao hgŭm hlăm anôk bruă duh mkra êngao Knŭk kna, Êpul hgŭm bruă srăng mâo klei kriê dlăng thơ̆ng kơ bruă, mâo hdră êlan mnia mblei, ksiêm dlăng ngăn prăk, mâo hdră êlan thơ̆ng kơ bruă, knŏng knang Êpul hgŭm bruă jing sa êpul bruă duh mkra klă sĭt čiăng nao hgŭm hlăm klei bi mguôp, boh tŭ mnơ̆ng dhơ̆ng.

Bruă duh mkra Việt Nam dôk bi mlih hŏng êlan mtah, dar leh anăn mlih mrô, kyuanăn alŭ wăl bruă duh mkra êpul, êpul hgŭm bruă dôk bi anăp klei čuăn mlih mrâo kluôm dhuôm kơ klei mĭn mkra mjing. bruă mkŏ wăl anôk duh mkra êngao Knŭk kna dưi dlăng jing hdră êlan yuôm bhăn čiăng mkŏ mjingêpul hgŭm bruă mđĭ ai dưi bi ktưn, găl guôp hŏng anôk mnia mblei.

Hluê si Nguyễn Thị Hoàng Yến - k’iăng khua anôk bruă duh mkra êpul hgŭm bruă leh anăn mđi kyar krĭng ƀuôn sang (Phŭn bruă lŏ hma leh anăn wăl hdĭp mda), lu êpul hgŭm bruă mâo hnơ̆ng mkra mjing điêt, kƀah klei thâo leh anăn anôk mnia mbei knŏng ƀiă. Klei anei ngă kơ mnơ̆ng dhơ̆ng lĕ hlăm klei mâo boh ƀiădah amâo mâo ênoh, mkra mjing kƀah hdră tă wưng sui. Êjai anăn, alŭ wăl bruă duh mkra êngao Knŭk kna mâo klei găl kơ ngăn prăk, kdrăp mrâo, klei mkăp brei leh anăn dưi truh ti anôk mnia mblei hlăm leh anăn êngao lăn čar. Bruă mtrŭt mđĭ klei bi mguôp plah wah dŭm êpul hgŭm bruă hŏng anôk bruă duh mkra êngao Knŭk kna srăng ƀrư̆ ƀrư̆ mkŏ mjing dŭm boh tŭ hơĭt kjăp. Aduôn Nguyễn Thị Hoàng Yến lač:

Tơdah bruă lŏ hma bi mlih jing hnơ̆ng prŏng, mtah hơĭt kjăp leh anăn ngă djŏ dŭm klei čuăn srăng tui duah phŭn agha čiăng mđĭ klei klă mngač, leh anăn hmei ƀuh tơdah knơ̆ng bruă duh bi liê prăk, kdrăp mrâo leh anăn kiă kriê êpul hgŭm bruă srăng mâo klei ksiêm dlăng hnơ̆ng jăk. Leh anăn tơdah dưi ngă 2 bruă anăn drei ƀuh boh tŭ mơ̆ng knơ̆ng bruă, Êpul hgŭm bruă leh anăn mnuih ƀuôn sang dưi mlih mơ̆ng bi mguôp hjăn jing wăl anôk jăk.

Čiăng kơ gru hmô bi mguôp plah wah Êpul hgŭm bruă hŏng bruă duh mkra êngao Knŭk kna đĭ kyar hơĭt kjăp, ai dưi ngăn prăk jing sa mta phŭn kmeh gơ̆ng. Klă sĭt brei ƀuh, lu êpul hgŭm bruă ăt dleh dlan hlăm klei lĭng čan kyua ngăn dŏ ba mgơ̆ng, klei kiă kriê adôk kƀah. Klei anei nga kơ êpul hgŭm bruă dleh dlan mơ̆ng masin, kdrăp mrâo amâodah pŏk mlar krĭng pla mjing. Êjai Êpul hgŭm bruă nao hgŭm bi mguôp hŏng knơ̆ng bruă, bi liê ngăn prăk srăng hrŏ kyua mâo klei kuôl kă ba čhĭ leh anăn ênoh prăk hơĭt.

Cao Xuân Thu Vân - Khua êpul hgŭm dŭm êpul hgŭm bruă Việt Nam lač, mđĭ kyar klei bi mguôp jing klei čiăng êdi čiăng mkŏ mjing gru hmô bruă duh mkra êpul hơĭt kjăp. Klei bi mguôp srăng mkŏ mjing boh kdrŭt bi mlih mrô hlăm alŭ wăl bruă duh mkra êpul, êpul hgŭm bruă. Klei anei đru mđĭ klei klă mngač, thơ̆ng kơ bruă leh anăn iêo jak phung mă bruă mda asei nao hgŭm hlăm bruă duh mkra bi mguôp. Kyuanăn, mkŏ klei bi mguôp hŏng anôk bruă duh mkra êngao Knŭk kna amâodjŏ klei čiăng mđĭ ai bi ktưn mơ̆ng boh mnga bruă lŏ hma Việt Nam hlăm klei mkăp brei tar rŏng lăn. Cao Xuân Thu Vân mñă ktang:

Hlăm klei bi mguôp pô akâo klei pap mnơ̆ng pô mkăn jing dleh sơnăk, ƀiădah srăng mâo klei mtăp mđơr, čiăng mtăp mđơr srăng ngă djŏ ênoh čuăn. tal dua jing tui duah phŭn agha srăng mâo djăp knơ̆ng bruă đru Êpul hgŭm. Leh anăn truh kơ prŏng Êpuol hgŭm bruă srăng mâo pô čŏng mđĭ Êpul gơ̆ng koă kriê leh anăn čŏng duh bi liê mơ̆ng prăk pô.

Hŏng klei mlih mrâo klei kiă kriê, hdră êlan mơ̆ng Knŭk kna hlăm wưng đĭ kyar mrâo, mkŏ mjing bruă duh mkra Êpul, êpul hgŭm bruă amâo djŏ alŭ wăl êdu awăt, ƀiădah lŏ jing sa anôk yuôm bhăn hlăm bruă duh mkra êngao Knŭk kna. Êjai mnơ̆ng mkŏ Êpul hgŭm bruă dưi đru djŏ hnơ̆ng srăng jing boh kdrŭt mtrŭt mđĭ boh tŭ dưn bruă lŏ hma Việt Nam đĭ kyar hơĭt kjăp, mơ̆ng anăn đru bi hơĭt hdră duh ƀơ̆ng, mđĭ hnư hrui wĭt kơ mnuih ƀuôn sang.