Hlăm ai êwa kdrưh kơăm, mgei ai tiê, Êpul mă bruă Gưl dlông pioh leh 1 mnĭt bi hdơr leh anăn hdơr kơ 192 čô kahan jhŏng ktang djiê êngiă dôk mdei ti msat. Khua knŭk kna leh anăn êpul mă bruă bi êdah klei hdơr knga prŏng prĭn leh anăn hlŏng lar hdơr kơ klei đru mguôp yuôm bhăn mơ̆ng phung Jhŏng ktang djiê êngiă duh myơr, săn asei kyua bruă cách mạng kdrưh kơăm mơ̆ng Đảng, mơ̆ng djuê ana.

Păn kjăp hdră bhiăn "Mnăm êa hdơr kơ hnoh", "Hdơr knga tla ai", Đảng, Knŭk kna leh anăn mnuih ƀuôn sang drei mđing dlăng nanao kơ mnuih mâo bruă tŭ dưn hŏng cách mạng; amâo mâo mdei mđing uêñ kơ klei hdĭp mnơ̆ng dhơ̆ng, ai tiê phung kahan êka êkeh, kahan ruă duam, găp djuê phung djiê êngiă lehanăn mnuih mâo bruă tŭ dưn; mbĭt anăn, lŏ dơ̆ng kriê pioh, mđĭ lar knhuah gru thâo khăp kơ lăn čar, bi mbŏ klei mĭn cách mạng, ksul mbŭ klei čang hmăng duh myơr, mkŏ mkra lehanăn răng mgang kjăp ala čar hlăm dŭm ênuk gưl hruê anei lehanăn êdei anăp.