Hơêč hmưi kơ Jennifer Wicks mâo ruah mdưm jing pô bi ala Mi ti Việt Nam, Khua knŭk kna mơĭt klei êmuh hrăm truh kơ Khua mil čhil Donald Trump leh anăn hơêc hmưi Knŭk kna, mnuih ƀuôn sang Mi ƀri wưng bi hdơr 250 thŭn hruê mkŏ mjing ala čar. Khua knŭk kna bi mklă Việt Nam sa ai dlăng Mi jing sa hlăm dŭm ƀĭng hgŭm yuôm bhăn mrô sa; sa ai hŏng Mi mâo bruă klam jăk kơ klei êđăp ênang, hơĭt kjăp leh anăn mdrŏng sah ti krĭng wăl leh anăn tar rŏng lăn. Khua knŭk kna lač dua tĭng brei mtrŭt mđĭ hdră bi hgŭm bruă duh mkra-mnia mblei hluê hdră bi knar, hơĭt kjăp, mâo klei tŭ dưn mbĭt; pral ruh mtlaih dŭm klei gun kpăk lehanăn hnưm bi leh klei blŭ hrăm, siñê Klei kuôl kă mnia blei bi hgŭm, mtăp mđơr leh anăn bi knar, mjing tur knơ̆ng hơĭt kjăp čiăng kơ anôk bruă duh mkra dua ala čar pŏk mlar hdră duh bi liê, mkra mjing, mnia mblei.

Khua bi ala Jennifer Wicks brei thâo Mi dlăng myuôm klei bi hgŭm hŏng Việt Nam; hŏng klei hưn mthâo “Klei ktưn hưn jing ƀĭng hgŭm mơ̆ng Việt Nam” mbĭt hŏng asăp lač jăk mơ̆ng Khua mil čhil Donald Trump leh anăn Khua phŭn bruă hŏng tač êngao Marco Rubio truh kơ Khua gĭt gai gưl dlông Việt Nam leh dŭm klei blŭ hơêč hmưi ƀri gưl 250 thŭn mkŏ mjing ala čar Mi -Khua bi ala Mi mñă klă klei bi hgŭm bruă duh mkra-mnia blei lŏ dơ̆ng jing klei mđing mrô sa hlăm wưng ñu păn bruă. Khua bi ala čang hmăng dua tĭng krơ̆ng kjăp klei bi trông jăk čiăng hnưm dưi mâo sa klei kuôl kă mnia mblei mâo hnơ̆ng čuăn lu, mâo knhuah bi knar, mtăp mđơr leh anăn bi knar, mơ̆ng anăn mjing thiăm klei găl bruă duh mkra, duh bi liê kơ jih dua ala čar.