Wăl msat kahan djiê êngiă Vị Xuyên jing anôk dơr mơ̆ng 1.972 čô lĭng kahan leh anăn 2 bĭt msat lĭng kahan êpul lu. Ti anăp knưng bi hdơr čar kwar hdơr knga, bi ala kơ khua gĭt gai Đảng leh anăn Knŭk kna, Khua knŭk kna Lê Minh Hưng mbĭt hŏng phung bi ala myơr leh mnga, brui mngưi, pioh mnĭt mmông bi hdơr leh anăn bi êdah klei hdơr knga amâo mâo knhal ti anăp klei đru mguôp prŏng prĭn mơ̆ng phung lĭng kahan jhŏng ktang djiê êngiă kyua klei hnŭk êngiê, hluh lir lăn čar.

Hlăm klei bi blah răng mgang knông lăn nah Dưr, ti wăl anôk Vị Xuyên, hŏng klei mĭn jhŏng ktang "Hdĭp păn boh tâo bi kdơ̆ng hŏng roh, djiê lŏ jing boh tâo amâo thâo rai", lĭng kahan leh anăn mnuih ƀuôn sang drei jhŏng ktang bi blah, săn asei wơr pô čiăng răng mgang lăn ala yuôm bhăn čar kwar.