Hlăm mmông mă bruă, Khua knŭk kna Lê Minh Hưng ktrâo klă, hdră mkŏ dăp bruă duh mkra mơ̆ng čar Lạng Sơn jưh knang hlăm bruă mnia mblei knông lăn, hdră bruă ƀăng jang knông lăn leh anăn dŭm bruă mâo ênoh yuôm đĭ ka lu ôh; kƀah mnơ̆ng dhơ̆ng hiu čhưn ênguê hnơ̆ng jăk; bruă tuh tia mkra mjing dôk jưh knang hlăm bruă mă mnơ̆ng hlăm gŭ lăn, bruă rŭ mdơ̆ng leh anăn dŭm bruă mâo ênoh đĭ ƀiă.

Khua knŭk kna ăt ktrâo klă, hdră ngă hră mơar mơ̆ng čar Lạng Sơn êmưt dưi mkra mlih, dôk hlăm êpul dŭm alŭ wăl mâo hnơ̆ng ƀiă hĭn hlăm kluôm ala leh anăn anei jing klei kpăk prŏng hŏng bruă iêo jak klei duh bi liê. Wưng kơ anăp, Khua knŭk kna mtă kơ čar Lạng Sơn bi mklă dŭm êpul bruă klam kơ hdră kčah đĭ kyar 6 mlan knhal jih thŭn leh anăn gĭr ktưn, jih ai tiê, hluê ngă kjăp, pŏk ngă ktang phĭt čiăng mâo mta kñăm đĭ kyar 10% hlăm thŭn anei. Hlăm anăn bi mklă gru hmô đĭ kyar djŏ guôp hŏng klei găl mdê hjăn ti čar knông lăn.