Bi ala kơ khua gĭt gai Đảng, Knŭk kna, Khua knŭk kna Lê Minh Hưng mpŭ mđup brei anăn knăl “Pô jhŏng ktang lĭng kahan yang ƀuôn” kơ Êpul lĭng kahan krĭng 4. Anei jing klei bi mni yuôm bhăn mơ̆ng Đảng, Knŭk kna leh anăn mnuih ƀuôn sang, čih yap kơ boh tŭ êdah kdlưn, mbĭt anăn mñă klă, hƀuê ênuk ba leh kơ Êpul kahan 4 klei lông dlăng dleh dlan snăk.

Lač klă, lăn čar dôk mŭt hlăm sa knhuang klei kčah mrâo, bruă klam mrâo hŏng klei răng mgang klei êđăp ênang leh anăn răng mgang čar kwar, kơ Êpul lĭng kahan, hlăm anăn mâo Êpul kahan 4, Khua  knŭk kna mtă, êpul kahan 4 kƀĭn ksiêm dlăng êlam klei mĭn, klei thâo răng mrâo kơ klei răng mgang klei êđăp ênang, răng mgang čar kwar hlue si Hdră mtrŭn Klei bi kƀĭn prŏng XIV mơ̆ng đảng; ngă jăk bruă đăo knăl, đru kčĕ hdră êlan, hdră msir, krơ̆ng kjăp wăl êđăp ênang, hơĭt kjăp čiăng mkŏ mjing, mđĭ kyar lăn čar, amâo luč klei răng hlăm djăp boh klei; kƀĭn mkŏ mjing êpul lĭng kahan krĭng 4 knhăk, mrâo mrang; lŏ dơ̆ng mkra mđĭ hlue si hdră khuăt, kjăp, ktang, hrăm mbĭt, tŭ dưn; thâo yua kdrăp mrâo mrang.