Hlăm mmông bi tuôm, čuă leh anăn mđup brei hnư mnơ̆ng tết kơ 400 gŏ sang knŭk kna dlăng ba, gŏ sang ƀun leh anăn mnuih mă bruă mâo klei hdĭp dleh dlan, k’iăng Khua knŭk kna êmuh hrăm, hơêč hmưi kơ grăp čô, grăp sang mâo sa Tết trei mđao, ênŭm ênap.

K’iăng Khua knŭk kna mñă klă, knŭk kna srăng mđing hluê ngă hrăm mbĭt dŭm hdră êlan bi hrŏ ƀun hơĭt kjăp, rơ̆ng kơ hnơ̆ng hdĭp leh anăn dŭm mta bruă yang ƀuôn, kriê dlăng hnơ̆ng klei hdĭp mơ̆ng mnuih ƀuôn sang, đru mđĭ kyar bruă mkra mjing, hơĭt kjăp klei hdĭp kơ gŏ sang ƀun. K’iăng Khua knŭk kna mñă kơ dŭm phŭn, dhar bruă, alŭ wăl lŏ dơ̆ng hluê ngă dŭm hdră mtrŭn, hdră êlan bi hrŏ ƀun, boh nik jing 3 hdră ala čar kñăm, gĭr bi leh ƀiă êdi hlăm brô 100.000 boh sang kơ phung ƀun ƀin, mnuih mă bruă hlăm thŭn 2025.